نشطاء «تويتر» لوزير الداخلية: ناقص تستقيل عشان تبقى محامي مجرمي السويس

استنكر نشطاء موقع التواصل الاجتماعي، «تويتر»، وصف اللواء محمد إبراهيم، وزير الداخليه، للمشتبه بهم في قتل الطالب أحمد حسين، ضحيه السويس، بانهم «ملتزمون دينياً»، نافياً انتماءهم لايه احزاب سياسية او تيارات متطرفه، كما رفضوا قوله: «ناس متدينين وبينصحوا، ولو كان الرجل قال انا اسف كان مشي»، في اشاره منهم الي ان اعتذار ضحيه السويس كان كفيلا بالحفاظ علي حياته، وهو ما اعتبره البعض مولد موجة جديدة من الجماعات الارهابيه.

ودشن نشطاء «تويتر» هاشتاج باسم «شهيد_السويس»، ينتقدون فيه تصريحات وزير الداخليه، فقال احدهم: «اللي مش بدقن، لازم يعتذر للي بدقن، حتي لو مش غلطان، ليه؟، عشان رئيسنا مركب دقن، وسلو بلدنا كده»، فيما خاطب احدهم الوزير، قائلا: «دول لو قرايبك مش هتبرر لهم القتل بالطريقه دي»، بينما قال احدهم: «هو وزير الداخليه لحق يقلب، ويعمل فيها ‎‫اسلامي‏ وكدا.. عليه العوض ومنه العوض».

ورفض البعض خروج وزير الداخليه، اللواء محمد ابراهيم، في مؤتمر صحفي ليشرح اسباب الجريمه، ثم يتحدث عن المتهمين ووجهة نظرهم فيما يفعلوه، فقال احد النشطاء: «هو وزير الداخليه بقي من ضمن مهماته، انه يشرح اسباب الجريمه من وجهه نظر القاتل، وكمان يبدي رايه في شخصيه القاتل؟»، بينما جاء تعليق اخر يقول: «فقط في حكومه الجنزوري.. وزير التضامن يقولك اعملوا المحشي بلسان العصفور.. ووزير الداخليه يقولك القتيل غلطان لانه ما اعتذرش»، فيما راي احدهم ان «وزير الداخليه بدفاعه عن قتله شاب السويس، وتبريره لفعلتهم, يعلن مولد جماعه ارهابيه جديده اسمها (الملتزمون دينيا للنصح والقتل)، تحت رعايته شخصيا».

وراي البعض ان «وزير الداخليه ناقص يستقيل، علشان يبقي محامي مجرمين السويس».