رجل.. لا يتتعتع

■ والله العظيم عارفة إننا ضايقناكوا وخنقناكوا وبقينا مملين وزنانين وعاملين زى العيل السئيل اللى ما بيبطلش تنييئ..

■ صحيح إحنا ساعات بنزودها ودمنا بيتقل ويقلب على دمعة ساقعة ومجلطة.. وصحيح مشتتين وعندنا سبعميت ائتلاف وتسعميت حزب وماعندناش قيادة نتوحد تحتها ونفوضها ونطمئن لقراراتها ونروح نتهد وننام عشان نصحى ندور عجلة البلد بقى ونمشيها لقدام.. وصحيح إننا مش كلنا موافقين على تصرفات كلنا.. ومش حاطين منهج موحد نتبعه كلنا عشان كلمتنا تتسمع.. فينا اللى مسفهينا واللى إحنا مسفهينهم.. وفينا اللى نايمين على قرشين تخان مش عارفين جايبينهم منين وبيلوحولنا بيهم ويفهمونا إنهم بالقرشين دول حايشتروا الأصوات فى أى انتخابات.. فينا اللى بيروح يتظاهر فى ميادين التحرير المختلفة.. وفينا اللى بيتابع ويعلق ويوجه ويصرخ من موقع عمله.. وفينا اللى بيركب دماغه ويصر على الاعتصام.. وفينا اللى بيتخيل نفسه رئيس جمهورية وياخد قرارات من عند خالته.. ويقرر يحتل جامع ولّا يقفل مجمع أو يقطع طريق حيوى ويوقف المراكب السايرة.. وفينا اللى قاعد يألف دستور على كيف كيفه.. واللى بيقسّم على أعضائه كراسى البرلمان من قبل ما تتنجد..

 وفينا اللى بينجر من لسانه ويقعد يصرح تصريحات فى برامج تخلينا عايزين نجيبه من لوزه ونقطع له لغاليغه.. وفينا اللى فرحان بألقاب كتير كده لزقت فى اسمه وبقى بيتقدم بيها فى المؤتمرات والبرامج والأحاديث الصحفية: المتحدث باسم.. نائب رئيس ائتلاف.. عضو لجنة المبرمجين بالتوجه.. حاجات كتير كده.. وفينا اللى متزرزر أربعة وعشرين ساعة ونازل نقد وتسفيه لرأى أى حد وكل حد.. وفينا اللى اكتشف فجأة متعة إنه يشتم كل الناس وإن الثورة حررته من قيود المقام والسن واللياقة والعادات القديمة البالية الرثة دى.. ولقى وسائط يفتح فيها مشتمة ويفرح بنفسه موت ويمشى زى دكر الوز بين أقرانه.. وفينا اللى زهق وطلعت روحه من سيرة البلطجية فقرر إنه يتبلطج عالمتبلطج.. واللى قرر ياخد القصاص بإيده علنا من البلطجية فأشاع فوضى مخيفة.. فينا كل العبر..

■ أعترف إننا بنختلف مع بعض فى أمور كتيرة.. لكن المؤكد والأكيد إننا كلنا بنتفق حاليا على بعض الأمور الثابتة.. واللى بنقرر نستمر فى الصراخ لإيماننا بصدق قضيتنا فيها.. واللى لو حضراتكم حليتوها حانروّح والله العظيم.. ده حتى إحنا تعبنا موت.. حالنا وقف واتخربت بيوتنا.. كبيرنا على صغيرنا.. زهوة التمنتاشر يوم اتخنقت جوه صدورنا.. زهقنا وماعون الصبر فضى.. لا بقينا قادرين نعيط ولا نضحك.. ده حتى ألبوم الذكريات الجميلة فى البلد دى نوره انطفى والصور عتمت..

■ متفقين على إن طلباتنا مشروعة.. متفقين على إن شرعية حضراتكم جت من تاريخكم المشرف وأداؤكم العسكرى المبهر على مر العصور.. ومننا.. إحنا الشعب.. اللى هو عمل ثورة.. مش أى حاجة تانية.. وأصر على تغيير النظام اللى طلّع عين أهله.. وحضراتكم وافقتونا وحميتونا وكنتم فى ضهرنا كعادتكم.. لكن.. فين رأس النظام اللى غيرناه ده؟؟.. قاعد فى مستشفى شرم الشيخ بيعمل إيه؟؟.. حضراتكم وإحنا نعلم تمام العلم إن هذا الرجل.. ماعندوش أيها حاجة.. غير أعباء السن الطبيعية.. وعمال يستموت ويقع من ع السرير ويسورق كل ما يسمع صوت رجلين فى الكيريدور.. يعنى فاصل من التمثيل الردىء مكشوف علينا كلنا لا يستحق عليه عضوية منتسبة حتى لنقابة الكومبارس.. والمدام قاعدة معاه مرافق.. روخرة كل ما حد يهوب ناحيتها تشغل أسطوانة قلبى قلبى وتقع.. بيقعوا كتير قوى ع الأرض.. يا حلاوة يا ولاد.. هو مش متهم والمفروض محبوس على ذمة التحقيق؟؟.. هو المتهم المحبوس مسموح له بمرافق؟؟.. طب ليه باقى المساجين مامعاهومش المدامات فى الحبس؟؟..

■ طيب هو مش عرض على النيابة وأخد خمستاشر يوم؟؟.. والله مانا فاكر] اتجدد له خمستاشر تانيين ولّا لأ؟؟.. وإمتى.. يااااه.. ده الخمستاشر يوم بتاعته طووووووووويلة قوى.. ولا هو مفرج عنه ولا إيه؟؟

■ هل هو موجود فى شرم الشيخ هو والمدام فقط؟؟.. لأ طبعا.. فيه ناس بتقوم على خدمته.. ناس برتب م الرياسة.. بيجيبوا له الأكل وبيقضوا طلبات البيت وزوجات الأبناء والأحفاد.. وبيسوقوا لهم العربيات.. وكل ده منين؟؟.. على حساب مين؟؟.. هل مازالت تصرف له مخصصات من الرئاسة؟؟.. ولا دى أموال الناس اللى موقوف حالها ومقطوع عيشها ومرمية فى ميادين التحرير مش لاقية اللضا لكن مابيروحوش عشان البلد دى تنهض بقى..

■ وإيه الحلاق اللى بيروح له كل أسبوعين ده؟؟.. بيحلق له وبيصبغ له برضه.. بيصبغ له ليه؟؟.. هو لسه بيطلع فى تساوير؟؟.. والحلاق ده بياخد أجرته وبدل انتقاله من مين؟؟..

■ طيب بلاش.. هى مستشفى شرم الشيخ دى مش بفلوس؟؟.. ده على افتراض إنها المستشفى اللى ما حصلتش والمنتجع الاستشفائى اللى بيداوى الأمراض المستعصية ويرجع الشباب ويخللى العاقر تخلف.. وعلى افتراض إنه أكثر تفوقا من المستشفى العملاق بتاع القوات المسلحة.. طيب أنهو أرخص، إنه يفضل قاعد حاجز جناح الله أعلم سعته وتكلفته بكل ملحقاته وحبشتكاته لمدة ست شهور وعلى قد ما ربنا يديله من عمر.. ولّا بالفلوس دى نجدد مستشفى طرة عشان ماحدش يبقاله حجة.. وأهو الخير يعم ع الكل.. الباشا المخلوع وباقى المساجين.. ولّا هو أمر واجب ولازم وضرورى وحتمى إن السجين لا يحصل على أى رعاية طبية، ومستشفيات السجون لازم تبقى فضيحة ومهزلة طبية وعار ضد حقوق الانسان..

■ إيه الراجل اللى مش عايز يتتعتع ده؟؟.. شايف حال البلد مقلوب.. فين شرف العسكرية ورجولة المقاتل اللى مستعد يموت عشان بلده؟؟.. بقى العيال اللى فى ريعان الشباب تموت وإنت قاعد مكلبش ف ملاية السرير؟؟.. شاطر بس يشحت التعاطف بالبقين بتوع: وعلى أرضه أموت.. طب سلم نفسك يا عم.. رجالة القوات المسلحة الأشراف محترمين البدلة العسكرية والشرف والقسم اللى إنت مش محترمهم.. يا راجل دانت من ساعة ما بقيت رئيس.. مالبستش البدلة ولا مرة.. إديت ضهرك لبدلتك وجريت استخبيت ف حضن العادلى وصفوت.. وتنصب علينا وتقعد تقول أنا بطل الضربة الجوية.. شرف عسكرى لا تستحقه ونسبته لنفسك.. وقبلت على ضميرك تخدع أجيال بادعاء بطولات زائفة.. إيه ده؟؟

■ يا سادة يا أشراف.. ضعوا الرجل أينما يستحق.. جربوا كده تقفلوا الملف ده وشوفوا رد الفعل.. لقد وعدتونا بالإسراع فى تحقيق المطالب.. ونحن نصدقكم.. فقط ابدأوا بالأفندى.. والنعمة الشريفة حانطمئن ونتهد ونص الوجع حايخف.. يالهوى.. الواحد مرارته اتفقعت رغم إنه شايلها.

[email protected]