المحتوى الرئيسى

كفاية مطالب

07/09 04:02

شيخ المجلس: حضرات الإخوة الأعضاء مازالت قضية الوطن ساخنة ومتشابكة والأمر معروض عليكم للمناقشة.

العضو الفلفوس: يا حضرات الإخوة في جميع أنحاء القطر المصرى.. الوطن أمانة في رقبتكم واللي بيحصل ده ملوش معني ولا فايدة ونتيجته غير طيبة لأن بالشكل اللي بيحصل ده يبقي الشعب المصري كله أصبح قبايل وعشاير وبقينا شلل بعد ما كنا كتلة واحدة تهز الجبال فاتقوا ربكم في وطنكم وكفاية مظاهرات وتجمعات وخطب وتصاريح جرانين وتليفزيونات.

العضو النمرود: اللي بيحصل ده في بلدنا غير سليم وتخريب لأن الثورة نجحت لما كنا إيد واحدة لكن دلوقتي أصبحنا ألف إيد وألف لسان، والتاريخ مش حايرحمكم وكفاية هتافات وخطب وتصريحات وتليفزيونات، البلد حاتضيع، الله ينتقم منكم.

العضو نطاط الحيط: يا عم المصيبة كلها في القنوات التليفزيونية اللي بتجري وراهم وكل واحد عمره لا يتعدي عشرين سنة.. القنوات تجري وراه ويطلع يقول كلام كبير قوي وكل واحد طبعاً بيبص لزميله والعيار فلت خلاص وربنا يستر وتفوت علي خير.

العضو زعيط: يا جماعة أنا مستغرب من اللي بيحصل ده لأن أنا عارف إن واجبنا حماية الثورة والحكومة دي حكومة تصريف أعمال مهمتها مراقبتها بس وإن انحرفت نقف لها بالمرصاد لغاية ما يتم ترتيب الدار من الداخل وبعدين كل واحد يطلع يقول اللي عاوز يقوله إن شاء الله يقول ريان يا فجل وكل واحد يطالب بحقه لكن دلوقتي الموضوع صعب علي الحكومة الحالية والله يهديكم وتهجعوا وتقفوا حائط صد لحماية الثورة.

العضو معيط: لو كان حبيبك عسل ما تلحسوش كله واللي بيحصل ده مش في مصلحة البلد لأن الخصوم بيدخلوا وسط المواطنين ويعملوا علي هدم الثورة فاتقوا ربكم يا جماعة وانتظروا ترتيب البيت زي ما قلتم.

العضو الفلحوص: يا جماعة السكينة سارقانا وبقينا نجري ورا شوية تصريحات لناس عاوزين يبقوا زعماء وإحنا مش داريين باللي في بالهم وهدفهم ركوب الكراسي قبل غيرهم وده اللي بيحصل، فلازم ولابد نعمل حيطة صد ورد للمحافظة علي ثورتنا لغاية البيت ما يتم تنظيمه وبعدها نطلع نقول بكل حرية وصوت عالي إحنا عاوزين حقنا في كذا وكذا.

شيخ المجلس: كلامكم في السليم وكفاية مهرجانات ومظاهرات وتليفزيونات وجرانين ونلتفت للبلد ونصحصح ونفتح عيوننا ولا ننام لحراسة الثورة من الغدارين حتي لا نندم وساعتها لا يفيد ندم ولا عياط.

أهم أخبار مصر

Comments

عاجل