حفل توديع عزوبية
الشمس بتصحى ومش عارفة
إيه هيجيلى
ولا إيه فى الدنيا دى باقى لى
وأنا زى الشمس مبعرفش
مطرح ما ترسى بدقلها
كاتب فى بطاقتى إنى هلهلى
بدعى للفوضى اللى فى يومى
يسلملى الـ«جاى» إذا كان جاى لى
حتى لو كان جايب أجلى
لهوجتى وصربعتى وعجلى
يسلملى الفرس المتروض
يسلملى القرش المتعضعض
يسلملى اليوم المتفرهد
وإذا فكرت إنى أتجوز
فى حاجة فى دولا تتعوض؟!
يسلملى الشجن اللى فى ضحكى
ساعة ما أحكى
وموبايلى ساعة ما بيفصل
وأبقى معزول عن كل الخلق
يسلملى الهلس المتكرر
والسجن العالى المتسور
والمتعة الموجودة فى نطه
والخدش الباقى فى كفينى
من جرح إزازه المتنطور
يسلم صحيانى فى ساعة العصر
وعينيه اللى تبوس الفجر
والنمة الهادية اللى فى ودنى
على طوب الأرض
والضحك بعلو الصوت وكأن
الكلمة بتملى كاسات للسكر
يسلملى الصاحب يا ابن الإيه
ساعة ما ألقانى قلبى عليه
ساعة ما يدمع لما أنجح
وأما نقبح
وأما نفكر فى اللى باعونا
ونقول «دول كانوا.. وخسرونا»
ونقول برضك «دول وحشونا»
ساعة ما بتبقى فى شريانى
آجى أصرخ آه.. فتقول يانى
تهرب فيا.. وأنا أهرب فيك
ممكن يا صحابى أستأذنكم
حفلة لتوديع العزوبية
وتكون مليانة على الآخر
Comments