المحتوى الرئيسى

أمير العسيرى يكتب: "عاشق"

06/23 08:20

أنا عاشق أنا رحال

وف عنيكى بقول موال

هواكى كل راسمالى

عنيكى دنيا راسمالى

ليالى الحب والفرحة

وحنه وزفه بالطرحة

وزيتونة أمل طارحة

وعش صغير ولقمة حلال

وبغزل من الحنين توبى

وأقول يا عينى يوم توبى

عن السمره اللى قتلانى

وشغلانى

ونسيانى

وسيبانى غريب رحال

أنا درويش بمسبحتى

بلف فى كل حواريكى

وابعتر سبحتى فرحه

يا عايقة فى لفة الطرحة

بناتك فى الغيطان سارحة

بهية وسيدة وصابحة

سمار الشمس على جبينهم

وعجبينا وعجبينهم

يغازلونا نغازلهم

يغنولنا الهوى موال

حمامك طار على دوحى

وعشعش فى سنا روحى

تعالى قرَّيبى ريحى

وطفى نار تباريحى

تهاود مركبك ريحى

ويبقى الوصل بينا حلال

دا أنا عاشقك ومجنونك

بدرت الحلم فى عيونك

سرح فى العالى زيتونك

شجر أخضر على غصونه

يتعانق صليب وهلال

يا ست الكل يا طاهرة

يا أم السد والقاهرة

يا قاهرة كل أعاديكى

على جراحى أعديكى

أحاديكى وأداديكى

وأرقيكى من الحساد

وعزالك

أهم أخبار مصر

Comments

عاجل