من صور تراثنا - للمرجعية قيمة بقلم: شفيق الدويك

من صور تراثنا – للمرجعية قيمة

بقلم: شفيق الدويك

بالهداوة يا خالتي، أنا بعرفك عاقل و متكتك ومش عصبي. عيني عليك باردة يا خالتي.

... مهو أخوك لكبير، وبيصرف على دراستك و أغراظك كلها، و طبعا مقامه من مقام رحمة والدك، و إنت هالمرة غلطان، أخوك مش مقصّر معاك بحاجة، و إنت ما درست بالمرة هاي السنة. بدناش نظحك على بعظنا البعظ، أنا بفهملكم يا شباب اليوم.

كنت زمان يا خالتي تبوس إيدي أول ما تشوفني وهسّـــه بطّلت بجوز لأنك كبرت شوية ! . وكنت تورجيني علاماتك وأعطيك حلوان. مش عارفة شو تغيّر فيك .

طب إحنا هيك يا خالتي إلنا عادات ولازم نظل متمسكين فيها لأنها والله كويسة و بتعمّر بيوت، لكبير بيعطف عا لصغير ولصغير بيحترم لكبير وبيسمعله، وهاظا لمصلحة الطرفين يا خالتي.

شعرك يا خالتي معمول مثل الإبــــر، وملابسك مشرشحة، إشي منها مخزوق من عند الركبة، وإشي مكحوت، وعدم المؤاخذة يا خالتي ملابسك الداخلية طالعة من البنطلون. طب هاظا مش حرام ؟ مش عيب؟ طب كيف أخوك بدو يمشّيك معاه وياخذك عند الناس؟ كيف وعندهم بيت أجر، والناس نازلة بأكل لحم بعظها البعظ؟

طب يا خالتي ليش ما تلبس ملابس عادية، وتحلق شعرك حلقة عادية مثل الخلق و الناس، تظغط على صحابك يعملوا زيّك، وتنتبهوا لدراستكم بدل الكلام الفاظي إللي مظيعين وقتكم كله فيه؟

الأستاذ قام، قعد، أصلع، سنانه مخلوعة، إتخوثنا عليه. مش عيب يا خالتي هاي المسخرة من إبن ناس مثلك؟ طب حط حالك محل الأستاذ يا خالتي، بتحب حدا يظحك عليك و يجيب سيرتك بالعاطل؟ مهو إلناس إولاد ناس وعائلات يا خالتي. طب مش خايف من ربنا يحطك بالنار يوم لحساب.

يا خالتي والله ما في إشي صعب ابدا. إركز في البيت، يعني ما تظل بالشوارع والحارات، وإستهدي بالله، بلاش هالموبايل إللي ماخذ كل وقتك. الله يقطع أهله هالدخّان وهالموبايل والإنترنت والكلام الفاظي.

الصحبه العاطلة إللي مش جايبه راس مالها، و الله ما رايحة تعملك إشي بكرة لما تصير كبير ، ونفسي تحكيلي شفت موظوع في الإنترنت عن الرياظيات تبعتكم.

و أحسن ما بكره يا خالتي تعظ على أصابعك ندم، بدي توعدني تنتبه لدروسك السنة الجاي من أولها، و تشد حالك و تشوف وظعك إذا عندك ظعف بدرس " أو صعوبة تعلم زي ما بيحكوا بالتلفزيون" أخوك وعدني يساعدك في أي حاجة مش فاهمها أول بأول .

ولك يا خالتي أخوك حابب تصير مهندس مثله، و الله كريم، و أي إشي ما بتفهمه أول مرة بتفهمه ثاني أو ثالث مرة، وإذا المدرس مش فهمان عليه، مثلا، أخوك بساعدك.

يا خالتي مش ممكن تاكل عنب بدون ما تحفر حفرة كويسة، تسمدها، تزرع الدالية فيها و تسقيها و ترشها وقت الرش و تنكش حوليها عشان تتنفس الشروش و تهتم فيها كل شوية.

هيك يا خالتي النجاح أو معدل التوجيهي بيلزمه ترتيب للوقت، وشغل كثير و مافي إشي بيجي بالساهل، بس بالأخير بيجي مع العزم و الإرادة القوية و إنت ما شالله عليك قدها و قدود و زلمة قادر تتحدى.

الفشل يا خالتي لما الواحد ما يستمر في الحاجة إللي بدا يعملها.

طب و الله سمعت بالراديو أول رئيس لأميركا راح عالمدرسه سنتين ثنتين بس و كمّل دراسته بالدار، و مش بس هو، حوالي ثلاثه مثله. تصور يا خالتي !