المحتوى الرئيسى

ولاء محمد تكتب: مطلوب رئيس جمهورية

06/15 00:28

البلد داخلة على انتخابات الرئاسة والعبد لله متعرفش إزاى تختار رئيس للجمهورية، حالى كحال السواد الأعظم من الناس، ورغم أنى عندى قدر من الثقافة العامة إلا أنى بردوا معرفش؟ إزاى أدى صوتى لمن يستحق.... إزاى اختاره؟ إيه هيا مواصفاته؟ وإزاى أئتمن المرشح على مستقبل بلدى؟ كل الأسئلة ديه بذهنى... فيكف حال اللى معندوش قدر من الثقافة؟ مش بقول إنى عبقرية ولكن الحمد لله بفهم شوية.... لحد دلوقتى مش لاقية برنامج انتخابى واحد سوى شعارات و رؤى، وأنا عايزة شخص يفهمنى حيعمل إيه بره وجوه مصر.


شكل مصر حيبقى إزاى معاه.... أنا هقول رأيى.. ورزقى على الله

*بلاش دولة العواجيز ديه ارحمونا بقى دى الرحمة حلوة هو ليه الناس فى بلدنا تفضل تشتغل لحد ما تتكل أو تتخلع، فى أى بلد تانية الواحد مش عيب لما يستجم ويستمتع بوقته بعد الخمسين، بلاش نموت على الدنيا أوى كده ده غير إن البنى آدم بعد 55 يفقد الكثير من لياقته النفسية وكفاءته العصبية والواحد شاف مرشحين فوق 70 سنة ربنا يديهم الصحة.

*ميبقاش عنيد ودكتاتور ولا يستعمل سياسة المركزية الفاشلة عيب ديه مش بلد أبوه، ديه بلد أبهاتنا كلنا.

لازم يعمل اجتماع كل شهر مع الشباب من كل التيارات السياسية والحزبية إحنا عندنا آلاف الشباب من الكفاءات فى كل المجالات.

*يقدم إقرار ذمته المالية سليم ومش مضروب وأنه ميكونش رجل أعمال أو عسكرى وأنه يمنع أساليب القمع والعنف اللى بتستخدمها الداخلية لحماية الرئيس والنظام وأن يكون له نائب منذ أول يوم فى سلطة الرئاسة.

*يكون خبرة فى العمل العام والسياسى مثقف وعلى دراية تامة بمشاكل البلد ويكون عنده فكر اقتصادى منفتح مش الإخوة اللى عايزين يعملوا دعاية ليهم على قفا الديمقراطية هى مصر ديه كعكة وبنقسمها؟؟ يعنى إيه لاعب كورة أو فنانة ترشح نفسها متخليكوا فى اللى انتو فيه أحسن واضح أنكم فاهمين الديمقراطية غلط.

*يصلح أجور الموظفين ويحارب الغلاء وجشع التجار وميسبش رجال الأعمال يبرطعوا براحتهم بمصالح وثروات البلد، ويهتم بالتعليم والصحة ومشاكل إسكان الشباب وإنهاء طوابير العاطلين من أصحاب المؤهلات اللى على القهاوى مع الاهتمام بالزراعة وأحوال الفلاح.

*يلغى قانون الحصانة ويكون أى مسئول خاضع للرقابة والمحاسبة وان كان رئيس الدولة أو عضو البرلمان أو وزير أو رئيس مؤسسة أو غيره، و يطبق عليهم زى غيرهم قانون: من أين لك هذا؟ وتكون كل المناصب فى الدولة بالانتخاب الحر المباشر، ويلغى مبدأ التعيين فى المجالس النيابية والتشريعية والتنفيذية العليا , بما فى ذلك منصب شيخ الأزهر وأساتذة الجامعات وعمدائها ورؤساء المجالس القومية فى جميع المجالات بما فيها المجلس القومى لحقوق الإنسان والمجلس القومى للمرأة.

*الولايات المتحدة العربية أيوا هو الاتحاد الأوربى أحسن مننا فى إيه؟ ده إحنا 22 دولة عربيه يعنى قوة عطمى لازم نتحرر يعنى يحارب العولمة والاستغلالية والسيطرة الاستعمارية الأمريكية الأوروبية الإسرائيلية.

وقبل ما أنسى فى حاجات مهمة تانية:

-ميكونش من المنوفية أو يعرف أى حد من المنوفية.

-يبقى بيغير على مراته جدا وميوريناش وشها السمح.

-عنده حساسية من ميدان مصطفى محمود.

أهم أخبار مصر

Comments

عاجل