راضى على حسين يكتب: عبى سجونك

عبى وحطى جوا سجونك ** اللى كان يسرق ويخونك

اللى كان بيمصمص دمك *** واللى كان بيغمى عيونك

سدى عليهم باب زنازينك ** ياما نهبوا سلبوا خزينك

ياما خنقوا الصوت ف حناجرك ** خلوا شمالك ييقى يمينك

حطى إيديهم جوا كلابشك ** طالع نازل واكل هابشك

خلوا حياتنا طفح مجارى ** مالى جيوبه خاطف كبشك

بصى عليهم بعيون حرسك ** ياما حطوا قيود على فرسك

خلوا الحلم معاكى بينزف** كرهوا أذانك رنة جرسك

لسا سجونك فيها براح *** للى خلا حياتنا جراح

سالب ناهب قوت أولادك *** حتى أثارك خدها وراح

خلى همومك حبل مشانق **** للى بيرصد نفسك خانق

كان بيدبح ضحكة طفلك ** ويبوس كل عدو يعانق

إدى مؤبد أو إعدام ** حكم مشدد ألفين عام

سرقوا سنين العمر الحلوه ** وكل كلامهم كان أوهام

سجن الوادى طره أبوزعبل ** حطى حرامى كان يستهبل

خلوا صوت الباطل يعلى ** خلوا الحق ضعيف يتكعبل

شدى قيودك ع السفاح *** اللى خلا السرقه كفاح

خلا كل الضحك أونطه *** بفلوس قمحك كل تفاح