روحتى فين..

بتسمعى مزيكا..

ولا بترسمى..

ولا ابتديتى تحلمى..

وقررتى فجأة

تتمردى ع الرتابة..

لو كنتى راجعة تكتبى..

بإحساسك المليان دفا

أرجوكى..

إوعى تبطلى كتابة..

ولا انتى قعدة بتلعبى ف قصاقيص ورق

وشاردة بعيد

وبتسرقك نفس الحاجات..

وتقومى تجرى تلحقى

الرز اللى شاط..

وما تلحقيش..

ولا انتى سرحانة ف مفيش..

ولا انتى واقفة قدام مسألة

محيرة بنتنا

ليلة امتحان آخر السنة..

ولا انتى مشغولة بيا أنا..

وافتكرتى تقصرى

رجل بنطلونى الطويل

ولا انتى لسة بتحسبيها

وعيونك الحلوة

بتختفى ورا كوم غسيل..

ولا انتى سايبة الدنيا تضرب وتقلب

ومسلمة عقلك

لرغى الربابة...

روحتى فين..؟