المحتوى الرئيسى

جهاد عماد الشال يكتب: الشعب يريد تحرير عقله

06/11 12:06

فى هذه الأيام لاحظت كثرة انتشار الشائعات والخزعبلات وقابلية الناس للاستهواء، حيث إن هناك لدى معظم المصريين قابلية كبيرة للاستهواء وتصديق الشائعات والخرافات مع التهويل عند النقل وسهولة وسرعة التصديق دون التفكير أو التمعن فيها والبحث عما وراءها، والأخطر من ذلك هو المساعدة على انتشارها دون حتى التأكد منها أو معرفة مصدرها فعلى سبيل المثال شائعة أن حماس هى من دخلت إلى مصر أثناء الاحتجاجات وقامت بدس بعض أعضائها من أجل زعزعة أمن واستقرار مصر.. بجد.. أم حنفى أخذت الكلمة من هنا وزودت عليها شوية وقالتها لأم سعيد وأم سعيد زودت شوية وقالت لجوزها وجوزها زود شوية وحكى لأصحابه لحد مالناس كلها عرفت والحكاية بقت بسيسة وهريسة وطبعا الرواية مش بتتنقل من كل واحد زى ماهى لأ دا ممكن يزودلها شوية خيال علمى ورومانسية وكده يعنى طب بذمتكم يا إخوانا هى حماس كانت عرفت تهرب أكل وذخيرة بسهولة عن طريق الأنفاق تحت الأرض لما هيقدروا يهربوا مئات من أعضائهم عشان يهددوا أمن بلدنا القومى وبعدين حتى لوعرفوا يهربوا ذخيرة بيهربوها بطلوع الروح يبقى هيهربوا ناس وسعتها يكون الرد يفور الدم وهو والله اللى كنا نحسبه موسى طلع فرعون وقصص زى كده كتير متعدوش وعلى فكرة الظاهرة دى موجودة من زمان بس زادت أيام الثورة وطلعت حكايات كتير زى القناصة الأجانب فى الميدان وناس كتير صدقت أنو فى كنتاكى وكان كل واحد يقول معقولة أضحى بحياتى عشان حتة فرخة محمرة خلاصة الموضوع والكلمتين اللى عايزة أقولهم يا إخوانا مش أى حاجة نصدقها وننقلها ومش أى حاجة تتقال تبقى صح وعلى فكرة فى شائعات ممكن فعلا تضر أمننا القومى.

أهم أخبار مصر

Comments

عاجل