المحتوى الرئيسى

من مدرجات الزمالك كيف شاهد الجمهور مباراة الشرطة

06/10 15:02

أستاد الكلية الحربية

25 الف متفرج زمالكاوى أصيل



فى تانى أسوء أستاد ف جمهورية مصر العربية قبل المباراة ب 3 ساعات كاملة ومنطقة صلاح سالم تحس انها مدينة كل اللى ساكن فيها زمالكاوية ورايحين يتفرجوا على الماتش منطقة لونها ابيض الناس ف العربيات مطلعة الاعلام البيضا بياعين الاعلام واقفين على جنبات الطريق والشوارع حوالين الاستاد واقفة تماما..

عشان تجيب تذكرة وتدخل دة موضوع صعب اوى اوى خصوصاً مع الزحمة الرهيبة من الجمهور على الابواب ..

دخول الاستاد كالعادة بدون زجاجات مياة ولا عصيان العلم اللهم سوى علب عصير كرتون وبالنسبة للى جايب معاه مياة بمنتهى الاستفزاز اللى ف الدنيا هتلاقى مخبر بياخدها منك يفتحهالك ويرمى الغطى ويقولك اشربها كلها دلوقتى عشان مش هتخش بيها.. دة لكل الجمهور ستات ورجالة وشباب واطفال ..ياترى بيحصل كدة مع الفرق التانية ولا جمهور الزمالك (يهود مصر) بيحصل معاهم كدة وبس؟؟؟؟؟

تواجد من الشرطة مكثف جدا جدا جدا عند الاستاد لحد المدرجات....



بعد المرور من البوابة واحنا ماشيين على رجلنا وطالعين المدرجات الناس فرحانه وكله بيجرى عايز يلحق مكان والاطفال اللى بترسم وشها بدون مقابل من الرسامين الزمالكاوية اللى بيقابلوك قبل ماتدخل المدرج على طول ويقولك ترسم وشك؟ تقوله هتاخد كام يقولك اللى تجيبه والله ياجماعة الكلام دة بجد اقسم بالله

الناس كلها امبارح كانت ف عيد وكان واحشنا اوى الزمالك كان بقالنا كتير ماشفناهوش ولا اطمنا عليه...

مع دخولى للمدرجات ووسط الفرحة ف عيون الجمهور بس تحس اننا كلنا مشحونين ومتوترين وكله بيتكلم ويقول مفيش مجال لاى نقطة تضيع بالذوق وبالعافية والناس بقت تهدى بعض وتقول بلاش نستعجلهم ولا نوترهم...

زائد ان الكل كان حاطط ايده على قلبه لغياب اكتر من لاعب زى عمرو زكى وحسن مصطفى والكل كان بيمنى نفسه انه مش مهم الاداء المهم نكسب واحد بس ونحافظ عليه...

اغلب الناس كانت فرحانه جدا لخروج المنتخب وفرحانة جدا ف سمير زاهر والجبلاية كلها..

ودار حديث مهم اوى قبل التسخين هو حسام ممكن يسبنا؟ هو حسن شحاته مدرب الزمالك القادم ؟والقسمة الجميلة ظهرت بين الجمهور مابين مؤيد ومعارض...

وكمان مش هقدر اكتب التوبيك دة وماشكرش شباب الرابطة بجد الناس دى تعبت اوى اوى اوى ف دخلة امبارح ووسط مالناس بتدخل هما كانوا حضروا ووزعوا الورق على كل كرسى ف المدرجات....



نزول الاسد وسط تشجيع كبير لعودة الثقة المفقودة بينه وبين كل زمالكاوى ...



نزول فريق الزمالك وتشجيع رهيب المدرجات كانت بتزلزل من تحتنا كلنا مع تشجيع رهيب كالعادة من اول الموسم لشيكا....



لاحظت ف التسخين ان شيكا والادهم بيشوطوا على الاسد من برة ال 18 ....



الشوط الاول شكل الزمالك ماكنش مبشر تماماً والاعصاب اتكرهبت جدا ف المدرجات ...

خط وسط الزمالك كان تايه تماماً وشكل الزمالك من المدرجات يوضحلك ان لو الشرطة بتلعب من غيرحارس الزمالك مش هايجيب جون....

الناس كانت بتشجع الاسد بعد الانفراد اللى انقذه والشوطة الاولى من اللاعب الاسمر اللى وقعت قوبنا....

مع دخول الهدف الكل مبقاش شايف قدامه وبعض الناس مكدبش عليكم كانت بتفكر تمشى واستسلمت تماماً والكل بقى يقول يارب نعدى بالتعادل حتى...

ولكن اعوذ بالله من كلمة انا وناس كتير اوى بقينا نزعق ف الناس ونقولهم الماتش ماخلصش وشجعوهم والناس استجابت الحمد لله والرابطة بسم الله ماشاء الله ماهمدتش حتى والزمالك وحش...



انتهى الشوط الاول وبدات المناقشات الساخنة اوى بين الناس... طيب هو حسام هايعمل اية ياجماعة هى دى القماشة اللى عنده؟ طب وليه منزلش مهاجم تانى؟ هو علاء على دوره اية؟ وليه بنخسر تغييرات؟

هانى سعيد فين؟؟؟؟؟؟ هو دة حسين ياسر؟ هو التوقف اضر الزمالك؟ هو اية ولا اية ولا اية الناس كلها ضلمت الليلة من شكل الزمالك الشوط الاول واقسملكم بالله من اول مابدء الدورى انا ماشوفتش الناس متشائمة بين الشوطين قد الماتش دة...



بدء الشوط التانى والجمهور بيشجع تشجيع رهيب والكل حس بتغيير هانى سعيد اللى مش لازم يقعد ع الدكة ياجماعة اى زمالكاوى بيروح الاستاد ويراقب لعبه ف الماتش كله مش هايلاقى غير باص او اتنين غلط طول الماتش وباقى الماتش لاعب تقيل ع الكورة بيطلعها لقدام من لمسة واحدة .....



الكل حس بتغيير ف اداء الزمالك الشوط التانى وان العجلة هتمشى من بعد ماهانى سعيد صنع الفرق ف نص الملعب اى نعم اداء الزمالك مش مبهر ولكن الروح العالية كانت باينة اوى والدش من حسام للاعيبة كان باين انه قوى اوى اوى...

ف وسط التشجيع الرهيب المغلف بالخوف شيكا احرز هدف ف وقته تماماً للفرقة وللجمهور ف المدرجات خصوصاً مع فرقة رزلة ورخمة فنياً زى الشرطة....



الملعب مع دخول الهدف اترج وبقت الارض تتهز من كتر مالناس واقفة على رجلها وبتنط على الارض وبتشجع واقسم بالله ياجماعة الكل بيشجع مش الشباب بس دة الستات والامهات والرجالة والاطفال الكل واقف بيشجع والملعب كله اتلهلب بعد جون جعفر ولعت ولعت ولعت ولعت ....



تغيير حسن يوسف الكل اشفق على الولد جدا ولكن لمسته للكورة تبين انه موهوب ولكن الناس بقت تقول بلاش ننفخ فيه زى محمد ابراهيم اللى نام من بعد ماتش المصرى.....



بعد الهدفين المدرجات هديت والكل واقف قلقان من الضغط بتاع الشرطة.....



الكلمات دى بتسمعها ف المدرجات ...ياساتر استر يارب يارب والنبى بسبب كل كورة بتروح على دفاع الزمالك اى كورة بتعدى بتروح وصفتى زى يونس زى فتح الله وسينا زى سونيا....



كل الجمهور اجمع امبارح ان 4 ورا مخلية شكل الفرقة ورا فضيحة بكل المقاييس خصوصا مع دخول شافى وغانم بقدام مش بيبقى غير فتح الله ويونس بس ورا ونسبة اى مهاجم انه يعدى 99 ف المية.....



أهم أخبار مصر

Comments

عاجل