دم الشهيد

شعر‏:‏ محمد بهجت دم الشهيد خالد سعيد يملا عروقنا بالحياة ويردنا ناس من جديد دم الشهيد خالد خلود النيل بيروي العطشانين خالد كصوت الحق يشفي المؤمنين وسعيد كأنه فرحة العمر الحزين وكأنه يوم الوقفة جاي من بعده عيد دم الشهيد بيدور يخبط ع البيوت يدي الأيادي قوة ويداوي السكوت ويهد فوق السقف خيط العنكبوت ويقول خلاص يوم الخلاص مابقاش بعيد دم الشهيد في اسكندرية ع الرصيف يملا الحواري بركة ويطري الرغيف ويلاقي كل وليف علي الشاطئ وليف ويعلي صوت المادنة والأجراس تزيد دم الشهيد يصرخ حرام الظلم ده ليه البرئ يامصر يتعذب كده احنا الشباب أمل الوطن ماحناش عدا وعدونا هو اللي عايزنا عبيد أصل الحكاية انه كشف المجرمين في القسم بيبيعوا الحشيش للمدمنين علنا وبحماية التخين وابن التخين والعدل عدلي والحبيب قابض أكيد طلقوا عليه المخبرين راحوا يجيبوه شدوه قصاد الناس وفضلوا يعذبوه سحلوه علي الأسفلت لما موتوه ولا حد قادر ينجده ويمد ايد وف كل جرنان أو محطة فيه شاويش يقولوا له إنه مافيش عذاب يبصم ما فيش يقولوا له ده تاجر حشيش يحلف حشيش والرب شاهد عالعباد يوم الوعيد دم الشهيد عمره ما يبرد أو يدوب دم الشهيد شريان بيجري في القلوب يعلن ميلاد الثورة وحياة الشعوب ويرمي كل الظلمة ورا قضبان حديد دم الشهيد.. خالد.. سعيد