المحتوى الرئيسى

رحاب صالح تكتب: انتماء.. وسياسة.. وثورة

05/30 21:38

إن أكثر جملة يكرهها الأشخاص الآن هى "أنت معندكش انتماء للبلد"، هذا عندما يتجادلون فى شىء ويختلفون..... ولكن هل سأل أحدكم ماذا يعنى الانتماء للوطن...؟، ماذا يعنى الحب للوطن....؟ وهل حقا تحب وطنك الذى لم يعطك أى شىء سوى الأمراض والقهر والذل والسجن والسحل فى الشوارع.....؟ دعونا نبتعد عن كلام الأغانى "ومقولش إيه اديتنا مصر وقول هندى إيه لمصر"، بلاش كلام شعارات.... خلونا واقعيين..... ماذا يعنى الانتماء....؟ جلست بجوار رجل عجوز وكنت أقرأ الجريدة.... وتبادلنا الحديث ووجدته يقول لى بعد حوار قصير إن الشباب برضه معذور وبلاش حكاية معندوش انتماء دى هو هيبقى عنده انتماء إزاى وبلده أصلا مش بتسأل فيه إنت عارفة كان فى شاب أجنبى اتهم فى قضية مخدرات فى بلد عربى وتمت محاكمته وسجنه ف هذا البلد وقامت حكومته بكل ما أوتيت من قوة لنقله لبلده وقضاء عقوبة السجن هناك، إلا أن الدولة العربية قالت إن هذا مخالف لقوانينها فما كان من الدولة الأجنبية إلا أن وفرت لمواطنها الشاب كافة سبل الراحة وقامت جامعته بإرسال كافة المواد التعليمية له بالسجن، حتى يستذكر دروسه ولا يمر عليه العام الدراسى مرور الكرام، وفى مقابلة للشاب مع وفد من دولته سأله رئيس الوفد " أتريد شيئا من بلدك...؟ فما كان من الشاب الذى لمس اهتمام دولته به إلا أن قال "أنا روحى لبلدى". ونظر لى الشيخ وقال "شايفة الفرق...؟ بينهم وبينا... شايفة الفرق بين الاهتمام وبين اللى بيسيبوهم يموتوا على شواطئ إيطاليا وتركيا وغيره، وبين الاهتمام بمواطن متهم بقضية مخدرات....؟ وبعد كدة تقولوا انتماء....؟؟؟!!!!" لا أعرف إذا كانت الحكاية حقيقية أم لا... ولكنى سمعت وقرأت عشرات القصص بهذا المعنى وساعتها أعقد المقارنات وأندهش... وأتحسر ********** أموال مبارك وأعوانه اللى لسة مش عارفين مصيرها إيه ولا حد معبرنا ... السيدة مارجريت سكوبى اللى بترفض الكشف عن التفاصيل...... والبنوك اللى مش معبرنا والدول اللى مش سائلة فينا، ده كله بيخلينى اد إيه أحس اننا دولة مالهاش كيان ومالهاش كلمة مسموعة.... ويا ريتها مصر بس..... لأ ده بلاتر اللى طبخ الطبخة مع قطر جاى دلوقت ويقول إن ده كان مجرد حلم.... طبعا حلم. أنت ازاى تفكر تتحدانى يا ولد..... عايز تبقى راسك براسى يا همام....؟ احلم على أدك يا شاطر.... وادى همام اللى مش همام... حس بغلطته ور اح يعتذر.... يا سلام على الدول العربية ومستواها يا سلام على قوتها وكلمتها المسموعة.... *************** بيقولوا إن الثورة دى اتعملت عشان الأسعار مولعة نار.... سألتنى...؟ وقبل ما أرد عليها كانت كملت كلامها قائلة" طب ما الأسعار بتزيد لسة... وكمان مفيش غاز ولا بترول.... ولاولاولاولا........ والله أيام مبارك كانت أحلى.... ده انتم شعب تييييييييييييييت" يا سلام.... بقى أيام مبارك كانت أحلى....؟ من ناحية إيه طيب....؟ مكانش فيه أزمة غاز....؟ مكانش فى زيادة أسعار.... مكانش فى إجرام ولا بلطجية...؟ أقول للناس اللى بتقول للكلام ده..... إصحوا من النوم بقى... كفاياكم نوووم أما بالنسبة لعدم محاكمة مبارك بدعوى سنه ومكانته وأنه مهما كان "راجل كبير وعلى وش موت" أقول "كل واحد يتكلم عن نفسه... اللى مات ابنه أو أبوه أو أخوه... اللى مات خطيبها واللى مات جوزها.... ودم الشهداء ده مين يتحاسب عليه....؟ وكلام الفنانين أمثال زوج زهرة الأولانى.... خليك ف مسلسلاتك الهادفة اللى بتناقش واقع البلد ده على أساس إننا عيال لسة..... وأخيرا.... هناك حديث لأشرف خلق الله رسوله محمد صلى الله عليه وسلم معناه أن "إنما أهلك من قبلكم أنهم كانوا إذا سرق القوى فيهم تركوه وإذا سرق ضعيفهم أقاموا عليه الحد ووالله لو أن فاطمة بنت محمد سرقت لقطعت يدها". فهل مبارك وأعوانه يا من تطلبون له الرحمة أفضل من فاطمة بنت محمد رسول الله...؟؟؟!!! لا تتحدثوا بلساننا..... فكل شخص حر وكل شخص يتحدث عن نفسه ولا تنصحونا فنحن نفهم جيدا الوضع.... ولن أسامح من استحل دماءنا ودنس طعامنا وصدر القوت لأعدائنا. أبدا.... لن أسامح ولن أصالح.

أهم أخبار مصر

Comments

عاجل