المحتوى الرئيسى

شباك علي الثورة

05/29 12:16

 المواطن المصري د. عبدالرحمن العايدي بتاع الآثار وقع في أدينا أو إحنا اللي وقعنا في أديه علي قناة مودرن حرية حيث استضافه معتز مطر اللي باشوفه لأول مرة وهو يقدم برنامجه »محطة مصر« والحقيقة ان مهمتي كانت في غاية الصعوبة وأني ما بقيتش ملاحق »أتفرج واسمع الدكتور عبدالرحمن العايدي اللي كان مركز علي موضوع سرقة تاريخ مصر المحروسة بواسطة عصابة لتهريب الآثار بقيادة سوزان ثابت وفاروق حسني و.... زاهي حواس وما أدراك ما زاهي حواس أنا بعد ما شفت البرنامج حصل لي لخلخة في دماغي.. أنا أصلي كنت فاهم أن زاهي حواس هذا هو حارس التاريخ المصري وكنت فرحان بيه قوي لدرجة أني أثناء مكالمة تليفونية قلت له: ـ أهلاً بالحارس الأمين!وبالمناسبة أنا عمري ما التقيته ما اعرفش بقي هل ده من حسن حظي أنا أو من حسن حظه هو؟ القصد اكتشفت صاحب »محطة مصر« معتز مطر أتاريه ياولداه زي حالاتي معبعب ومليان وفاض به برضه زي حالاتي وحالات ملايين المصريين اللي هما فرقة »ياقلبي ياكتاكت ياما انت مليان وساكت« وعلي مدي الحوار اللي دار بينه وبين الدكتور عبدالرحمن العايدي كنت حاسس ان عينه حتبظ من وشه من الغيظ اللي سقاهو لنا نظام الفاسد حسني مبارك علي مدي ثلاثين سنة وحسبنا الله ونعم الوكيل ولو كان الاتصال بالبرنامج ممكن كنت أنا اكون أول المتصلين وكان سؤالي الأول فاروق حسني فعلاً سرقها لحساب السيدة الأولي طب وبعد ما وصلها راحت فين؟ هل احتفظت بيها سوزان من باب الاقتناء والوجاهة الاجتماعية؟ وحين طرحت هذا السؤال علي صديقي الدكتور أشرف سلامة ضحك بمرارة وقال لي:ـ دول برضه ياعم احمد وش ذلك دول شوية لمامة وربنا ابتلانا بيهم عشان نفوق بقي ونرجع لأصلنا ونرجع بلدنا ـ مصر المحروسة ـ لأصلها تاني قول يارب قلت:ـ يارب يا أكرم من سئل مالناش غيرك منتقم جبار ع اللي خربوا بلدنا ونهبوها وباعوها وشوهوا سمعتها وأذلوها... لكن قول لي يا أشرف:قال وهو بيضحك:ـ قول لي انتقلت له:ـ انت عارف ان حسني مبارك وعياله كانوا بيستولوا علي دخل قناة السويس بشكل يومي.ضحك وقال لي:ـ علي أساس انهم أحفاد ديليسبس.قلت له:ـ ولسه ياما في الجراب ياحاوي.>>>رجاء حار للمجلس الأعلي للقوات المسلحة وحياة دم الشهدا تفرجونا علي محاكمة هذه العصابة وده أبسط حقوقنا ومش مهم الاحكام لأننا مازلنا نثق في قضاء مصر العظيم ولكم منا الحب والاحترام وانتو برضه ولادنا.

أهم أخبار مصر

Comments

عاجل