محمد دياب يكتب : ضد ثوره الغضب ''التانيه'' و مع مليونيه في نفس اليوم

محمد دياب يكتب : ضد ثوره الغضب ''التانيه'' و مع مليونيه في نفس اليوم 31 هتلاقي خلاف كبير في اسباب كل واحد ناوي ينزل الجمعه 27 مايو2011.. هتلاقي اسباب يتحمل مسؤليتها المجلس العسكري زي المحاكمات العسكريه للنشطاء و عدم محاكمه الفاسدين بقانون الفساد السياسي و الاكتفاء بالكسب غير المشروع و انتهاءً بالاحساس العام لعدم القناعه بجديه محاكمه الرئيس و اولاده و زوجتهانا  كنت محظوظ انه يكون لي نظره قريبه علي الموضوع ... قعدت مع المجلس العسكري اكتر من مره ... و علي قد ما كانت نظرتي ليهم فيها شك قبل ما اقابلهم حتي اني كنت من أوائل اللي انتقدوا اداره المجلس العسكري لبعض الامور، الا اني بعد مقابلتهم و سماع وجهه نظرهم و ظروف اداره البلاد في الوقت الصعب ده، تفهمت كثيراً بعض هذه القرارات و تفهمت ايضاً ان الاخطاء اللي بتحصل و ساعات بتثير الشكوك بتبقي معظمها سوء إداره و الناس معذورين في الحته دي، بيعملوا شغلانه مش شغلتهم في اصعب ظرف في تاريخ البلد.... بس اللي اتأكدت منه تماماً ان الناس دي وطنيه، و وطنيه جداًالنقطه دي مهمه جداً لما نيجي نتكلم علي المجلس العسكري ... في فرق لما انتقدهم، و بصراحه هما يستاهلوا النقد بكميه القرارات الملخبطه و فكره جس النبض بغشوميه شديده ... في حد يجس النبض يقوم في يومين يصدر قرارات بالافراج عن فتحي سرور، و زكريا عزمي ، سوزان مبارك و يسرب خبر ان مبارك هيعتذر!!!!!! في اليومين دول بس تضاعف المشككين في المجلس العسكري عن اي وقت قبل كده للأسف المجلس مسؤل عن اهتزاز الثقه بينه و بين الناس كل شويه، تباطؤ في قراراته اللي غالباً مبتجيش الا بضغط، و إنكار لتجاوزات في حق ناشطين و مدنيين يفسر في النهايه علي انه كذب و يقلل مساحه الثقه اكتر، مع ان حل مواضيع التجاوزات دي هو الاعتراف بيها و توضيح انها تجاوزات فرديه، و عدم خبره في التعامل مع المدنيين و ليست تجاوزات منهجيه.لكن لأننا عاطفيين و ناس كتير مننا يا يمين، يا شمال، مفيش في النص، بدأت اسمع ناس و خاصه ثوار بيحملوا الجيش مشكله كل حاجه بنمر بيها في الفتره الانتقاليه ... و هو إسلوب هايل للهروب نفسياً من الانتقادات اللي بيتهمها البعض للثوار بالمسؤليه عن الفوضي، فأسهل حاجه نفسياً الاقي شماعه جديده.المشاكل اللي بتحصل و الانفلات الامني و المشكله الاقتصاديه اللي بنواجهها و هتزيد و احنا مصّرين ان قمه الوطنيه انكارها .. هي تمن رخيص لحريتنا و استثمار لمستقبل ولادنا ... مش كنت بتشتغل طول عمرك عشان تجوز الواد و البت  و تجيبلهم شقه، اعتبر الفتره دي تحويش لمستقبلهمو مره تانيه المشاكل دي مسؤليه النظام القديم لوحده، و حلها مستحيل هيكون كن فيكون، و حط نفسك مكان المجلس العسكري لثواني ... و قولي نحل المشكله الامنيه ازاي؟ ... بالحزم ... طب الشرطه ملهاش قوه و مهدوده، يبقي مفيش غير الجيش للي ميعرفش يتعامل مع الناس و بيطبق معاهم الاسلوب العسكري اللي مينفعش مع المدنيين، زي اللي حصل يوم السفاره الاسرائيليه ... طب لو ساب الدنيا خالص هنتبصط؟؟؟؟ لأ  بنتهمه بالتراخي و التساهل و التسيببالتأكيد مش بقول ان مفيش حلول غير دي، بس بقول ان الموقف صعب و الجيش في موقف لا يحسد عليه ، الف حمد و شكر ليك يا رب ان محدش فينا في موقفهم سمعت حد بيقول انا نازل عشان مش حاسس بتغيير، مصر زي ما هيه قبل الثوره و بعدها ... طب ايه علاقه الجيش بالموضوع ده!!!  ... احنا شلنا النظام انما اللي الناس بقالها تلاتين سنه بتتعلمه من اخلاق و سلوكيات غلط عاوز ثوره اخلاقيه و سلوكيه هتاخد وقت طويل و مينفعش احمل حد في السلطه مسؤليتهابالنسبه ليا شايف ان النزول يوم الجمعه الجايه ممكن يبقي مفيد و ممكن يبقي مضر ... لو النزول هيكون لأسباب و مطالب متفقين عليها يبقي ننزل ... انما لما الاسباب و المطالب تكون مش متفق عليه و مش منطقيه  زي و احد كاتب احد المطالب ان الجيش يبقي بالانتخاب!!!! ده اي كلام ... للي مدخلش جيش، الجيش قايم علي الالتزام بالاوامر، و مفيش جيش في العالم كله بالانتخاب لأن دي فكره عبثيه تهد فكره الجيش نفسهافي فرق بين النزول لتأكيد المطالب و بين ناس نازله و بينها و بين الجيش تار ... اسم اليوم نفسه انا معترض عليه تماماً ... ثوره الغضب التانيه ، تذكرنا فوراً بثوره الغضب الاولي و هو اكتر يوم حصل فيه مواجهات و إستشهد فيه شهداء،... فيه حاجه اسمها الربط الذهني ... في شباب مجرد ما هيسمعوا الاسم ده هيبقوا نازلين و المواجهات في دماغهم و العدو الجديد مين؟؟؟؟ .... الجيشسوء اداره الجيش لبعض الملفات ميخليهوش عدونا ...  الساده اللي حاطين الجيش في دماغهم و معظمهم علي تويتر، علي فكره احنا مش من مصلحتنا إضعاف الجيش احنا مصلحتنا تحييده و ضمان انه ينفذ مطالب الثوره، و حتي لو فكرت براجماتياً فمصلحتنا هي الحفاظ علي الجيش كقوه تضمن الحفاظ علي مدنيه الدوله سؤال مهم هنا ... هو لو إحنا بالضغط بتاع كل جمعه و من غير مواجهات  بتتحقق كل مطالبنا، يبقي فيه داعي إننا نصعد لدرجه  ان مصري تاني ممكن يفقد حياته؟؟؟؟؟؟؟؟؟؟؟؟؟؟؟؟؟؟؟؟؟ اذا كنا إتأكدنا ميه في الميه إن الجيش هيسلم السلطه، و الانتخابات كمان تلات شهور، يبقي لسه في داعي ان إسره جديده تتحرم من إبنها؟؟؟؟؟؟؟؟؟؟؟؟يعني ننزل ولا مننزلش؟؟انزل لو حاطط في دماغك انك بتأكد علي مطالب، زي محاكمه رؤس الفساد ، منع المحاكمات العسكريه للناشطين، محاكمه قتله المتظاهرين ... انما لو نازل و في دماغك ان يوم الجمعه الجاي هيبقي يوم المواجهه مع الجيش فأرجوك راجع نفسك و بصراحه انا شخصياً لو اسم اليوم متغيرش لحاجه تانيه غير الاسم اللي بيوحي بالمواجهه ده و قد يتسبب في ضحايا بدون أي داعي فمؤكد إني لن اشارك اللهم بلغت اللهم فأشهد