المحتوى الرئيسى

عمرو حسين يكتب: مشهد رأسى من التوك توك شو

05/23 10:08

عمرو حسين يكتب: مشهد رأسى من التوك توك شو 23 مايو 2011 | الجريدة (خاص) : كتب عمرو حسين مشهد رأسى من التوك توك شو المشهد الخيالى التالى مستوحى من أحداث حقيقية … فيلم “حزب لكل مواطن” ليل/داخلى مشهد 547 استوديو هواء إضاءة خافتة، المذيعة تمسك بمرآه لتعدل تسريحتها و هناك 4 شباب يتهامسون و يضحكون معاً… صوت استعدوا، حنطلع عالهوا… 3 2 1 هواااا المذيعة أهلاً بيكم أعزائى المشاهدين مع حلكة مثيرة من البرنامج، انهارده معانا ممثلين عن 4 أحزاب متحررة بتمثل الفكر التحررى الثورى، حنحاول نعمل مناظرة بينهم علشان نقرب أفكارهم لعامة الناس اللى هما أنتم… السؤال الأول لكل حزب إيه فكر و أيديولوجيات حزبكم؟ شاب من حزب 1 إحنا حزبنا متحرر مؤمن بالفكر التحررى شاب من حزب 2 إحنا بقى حزب مختلف تماماً مؤمنين بالفكر التحررى الديمقراطى المذيعة (موجهة كلامها للشاب الأول) أيه ده يعنى أنتم مش ديمكراتيين؟ الشاب من حزب 1 مين قال كده طبعاً الديمقراطية جزء من فكرنا المذيعة (تبدو مش فاهمة و توجه الكلام للشاب الثالث) طب و أنتم؟ شاب من حزب 3 لأ احنا بقى مختلفين تماماً، احنا حزب تحررى ديمقراطى مصرى المذيعة (تنظر للشابين الأول و الثانى باستغراب ثم تتجه للرابع) و حضرتك طبعاً تحررى ديمكراتى مسرى و حاجة تانية، إيه بقى؟؟ شاب من حزب 4 لأ إحنا حزبنا مش حزب كلام، إحنا بتوع برامج بلا تحررى بلا ديمقراطى، زهقنا كلام، إحنا بتوع براااامج… المذيعة (و يبدو عليها الاستغراب و عدم الفهم) طيب السؤال التانى: ايه مسادر تمويلكم؟؟ الشاب من حزب 1 تبرعات الأعضاء مباشرةً للحزب بالأموال و المقار و عم المتحررين فى مصر بيمولنا كمان ! الشاب من حزب 2 لأ الوضع عندنا مختلف تماماً، إحنا عندنا فتحنا حساب فى البنك و الأعضاء بيتبرعوا فيه.. الشاب من الحزب 3 احنا كمان عم المتحررين بيمولنا مش أنتم بس، بس احنا مش ساكتين عندنا آلاف الأعضاء المتبرعين برضه الشاب من حزب 4 احنا بقى من شباب الثورة و احنا الوضع عندنا مختلف، إحنا نفسنا اللى بنتبرع! المذيعة طيب و ايه وجه الخلاف بينكم كلكم يعنى ما كلكم برضه زى بعض التبرعات هى مسدر الدخل؟ ده نفس الأشخاص بيدعموا أكتر من حزب!! الشاب من الحزب 4 لأ حضرتك فيه اختلافات فى المقار و إختلاف فى البنوك و حتى المتبرعين، مش هما هما ! المذيعة (تفتح فمها و هى تحاول إستيعاب ما قال) طيب خلاص أنا حأحاول أفهم الفرق بسؤال تانى: طيب حضرتك ليه انضميت للحزب ده بالذات ما كلكم زى بعض؟؟ الشاب من حزب 1 لأ احنا حزبنا هنا من زمان، إحنا من قبل الثورة، إحنا جينا الأول، حضرتك إساليهم هما ما إنضموش لينا ليه؟؟ المذيعة ( و قد تقبلت الإجابة تتجه للشاب التانى) طيب حضرتك لو موافق على الفكر ده ليه ما إنضميتش للحزب ده؟ الشاب من حزب 2 أنا أنضم؟؟ أنا ما أنضمش لحزب، أنا من شباب الثورة، و الأحزاب اللى قبل الثورة فاشلة، احنا قمنا بثورة حضرتك ! المذيعة (للشاب التالت) طيب لو حضرتك من شباب الثورة ليه ما انضميتش للحزب التانى مش كلكم كنتم مع بعض فى الميدان؟ الشاب من حزب 3 أنا أنضم للحزب بتاع الشباب دول، حضرتك ده إهانة، إحنا كنا عند المتحف و هما كانوا عند عمر مكرم المذيعة و ماله؟؟ ما كله ميدان التحرير الشاب من حزب 3 لأ و ألف لأ، احنا اللى حمينا المتحف، و بعدين يوم موقعة الجمل، الجمال جت منين؟؟ احنا اللى صدينا الهجوم هما كانوا فين؟ المذيعة حضرتك عايز تشكك فى وطنيتهم؟ الشاب من حزب 3 حضرتك الأستاذ ده بعد موقعة الجمل روح بيتهم استحمى و غير هدومه فى الوقت اللى كنا إحنا فيه ثابتين فى الميدان! المذيعة يعنى حضرتك عملت حزب جديد علشان حضرته روح إستحمى؟؟؟!! طيب و الحزب الرابع؟؟ الشاب من الحزب 4 ما أنا قلت لحضرتك، دول بتوع كلام، إحنا بتوع برامج براااااااااااااامج. المذيعة المخرج بلغنى فى الكنترول دلوقتى اننا لقينا فجأة حزب تحررى خامس موجود من حوالى 90 سنة و كنا ناسيينه، أنا طبعاً بأعتذر و المرة الجاية لازم يكون معانا… إيه؟؟ ( و هى تضغط على السماعة) فريق الإعداد بلغنا كمان إن فيه حوالى 3 أحزاب تحررية تانية تحت الإنشاء.. يعنى 4 و 1 قديم و 3 فى الفرن شكل الموضوع تقريباً بقى فوبيا، طيب المواطن التحررى يدى صوته لمين دلوقتى؟؟ أعزائى المشاهدين فاصل أحاول أفهم و أرجعلكم تانى! بإمكانكم دومًا متابعة آخر أخبار الجريدة عبر خدماتها على موقع تويتر أو عبر موقع فيسبوك. اقرأ أيضًا: عمرو حسين يكتب: و للمعارضة أيضاً ... فلول !عمرو حسين يكتب: إجابة السؤال الحائر: هل نجحت ثورتنا؟عمرو حسين يكتب: رسالة للمتطرفين من أفغانستان لإمبابة

أهم أخبار مصر

Comments

عاجل