د. هانى أبوالفتوح يكتب: جَايزْ.. وِ.. جَايزْ

كل يوم.. فيه.. جايز.. يجوز وزمان.. جاز كتير جايز بحبك.. وجايز إنى.. يادوبك باغير وجايز مِتنبِل.. وللا مِبرشم وجايز أركب جناحات وأطير وأقول عبقرية.. وأقول واد مِفَنجل وأخطر خطير!! وجايز حرامى.. يقولوا صوابعه تتلف ف حرير وبَمْشِى فى شوارعك.. أنام ع الرصيف.. وكاره السرير وبَعْمِل مِدقدق.. وأقول واد علامة وقمة وهامة وبَعْمِل شاويش.. وبَعْمِل غفير وبَسْرَق ساعات.. لكن لحكمة.. ولْعُوزَة وضرورة وأكل الملبس وأشرب السجاير وأكل الفطير و إِوعَاكْ تِقُولِى.. دا نصاب وعِيرة لأنى أما بَسْرق.. سرقت بضمير! ولأنى ساعات بَدِى الغلابة ياكلوا معايا ونقعد نفرفش وجايز نحشش وأعمل معاهم دماغ م الكبير .................................. أنا ابنك يا مصر! يا لَمة الديابة.. ولَمة التعابة ولَمة الحرامى.. ولَمة النضيف.. ولَمة الشريف وعالم وعالمة.. ودكتور له كلمة.. وأجدع سفير وعايشة بجيشك.. دايماً.. نافشه ريشك تقولى.. يارب.. خلى اللى باقى.. ويفضل بخير ........................................ جه دلوقتى دورى.. أفكر شوية أتقدم لحكمك وساعتها هَفْرِش شوارعك محبة.. وجايز حصير وعشان شعب مصر.. يستاهل يا مصر جايز كمان.. أفرش لك حرير ........................................... جايز.. وجايز.. وأقول ألف جايز أتارينى نايم.. بشخر شخير وأصحى ألاقى الحلم اللى باقى فى راسى بيجرى.. ومش باقى منه غير خيبة وويبة لا كرسى رئاسة.. ولا كرسى وزارة.. ولا كرسى مدير ......................................... وخيرها فى غيرها.. نشوف ثورة تانية وأروح دولة تانية ألاقينى برضو فى نفس المصير يبقى العيب فى جايز.. وشبعان وعاوز ومش راضى يشبع.. وهو اللى يفهم والباقى.. حمير ............................................ وكفاية.. إنى جايز.. وعايش فى ضلك.. عاشق سماكى.. وأرضك ونخلك.. وبايس ترابك ونفسى أشوفك يا غالية يا مصر دايماً بخير.. دايماً بخير.. دايماً بخير