المحتوى الرئيسى

"افتح قلبك مع هبة يس"..أعرف منين إنه هايكون زوج كويس؟

05/05 14:56

*أرسلت "ج.ى" إلى افتح قلبك تقول: عمرى 25 سنة يعنى المفروض أكون كبرت و فهمت ازاى احكم على الناس، لكن فى مشكله كبيره بتواجهنى كل ما يتقدم لى عريس أو حتى لو حاول حد يتقرب مني، ازاى أعرف إن الإنسان الى هارتبط بيه ده (يقدس الحياه الزوجيه) زى ما بيقولوا؟، وانه بتاع مسئوليه و ارتباط حقيقي، و انه مش ممكن هايسيبنى فى نص الطريق؟... شوفى يا (ج) الحقيقه انه مفيش حد كبير لدرجه يقدر فيها يجزم انه يقدر يفهم كل الناس، لأنه فى الأول و الآخر النوايا محلها القلوب التى فى الصدور، وبالتالى الله أعلم بها، لكن كل الى نقدر نعمله احنا البنى آدمين اننا نحاول نقرأ الشواهد، فمثلا: 1) اختبرى مدى ارتباط الإنسان ده بأصدقائه، يعنى لو طول الوقت بيتكلم بصيغة (احنا) عليه هو أصحابه، فده معناه ان الشخص ده مش هايكون من النوع (البيتوتي) الى هايفضل جنبك طول اليوم، وده فى حد ذاته مش عيب، لكن لو الموضوع زايد عن الطبيعي، فده مؤشر الى انه احتمال لا تجديه و قت احتياجك له فى المستقبل. 2) اعرفى مدى ارتباطه بالآخرين أو بالأشياء الآخرى، هل هو مستقر فى شغله؟، هل كان له علاقات سابقه متعدده؟، هل سافر و غير مكان إقامته اكتر من مره بدون سبب وجيه؟، الانسان الى بيغير كتير، سواء فى شغله أو بيته أو حتى فى عربيته ده ممكن جدا يكون انسان ملول، بيزهق بسرعة و لا يطيق الارتباط أو الالتزام لفترات طويله، وبالتالى ممكن يتهرب من التزاماته ناحيتك مستقبلا. 3) انتبهى جدا لطريقة معامله والده لوالدته، ففى اغلب الأحيان الإنسان بيكرر أسلوب التعامل إلى شافه فى بيته بشكل لا واعي، فلو كان والده من النوع الغير متحمل للمسئوليه يبقى احتمال كبير جدا انه هايتصرف بالمثل. 4) إيه خبراته عن الزواج؟، يعنى أصحابه أو قرايبه المتزوجين، هو شايف زيجاتهم ازاي؟ لأنه برأيه فيهم هاينقل لك فكرته و اعتقاده عن الزواج و الارتباط، والى هو شايفه حلو أو وحش فيهم. 5) حاولى تكونى معاه فى مكان فيه اطفال لبعض الوقت، يعنى مثلا زياره عائليه أو عيد ميلاد، أو حتى حديقه عامه، و شوفى طريقة تعامله و احتماله للأطفال، هل هايلاعبهم و يهتم بيهم، ولا هايبعد عنهم وكأنهم غير موجودين، ولا هايتأفف منهم و يتضايق من دوشتهم؟وكل ده هايديكى فكره عن مدى تقبله للأطفال عموما . 6) وأخيرا ماهو حجم الوقت و الجهد الى بيمنحه لك ولاهتماماتك؟، هل عنده استعداد يسمعك لمده كافيه ولا مش بتقدرى تكملى معاه موضوع واحد؟، هل ممكن يروح معاكى مشوار يخصك حتى لو مايهموش؟، هل ممكن يتحملك فى وقت ضيقك زى فى وقت فرحك؟ ، هل ممكن يضحى بحاجه هو عايزها لو أنت مش عايزاها؟ اعتقد انك لو قدرتى تجاوبى على الأسئله دى هاتكونى بكده قدرتى تكونى فكره واقعيه عن الانسان الى هاترتبطى بيه، وهل هو الشخص المناسب ولا لأ. للتواصل مع افتح قلبك: h.yasien@youm7.com

أهم أخبار مصر

Comments

عاجل