المحتوى الرئيسى

صفاء عبد المرتضى تكتب: مش عارفة بس إزاى وليه؟

04/22 23:49

لما كنت صغيرة كان أبويه مرتبه 90 جنيه هوه ده اللى فى الشهر كل اللى كان بيتحصل عليه وأمى من ناحيتها كات تساعده باللى كات تقدر عليه مرة عدس مرة بامية مش شرط يعنى كل يوم ناكل فيليه وفى مدارس حلوة علمونا لاجل مابقى مُدرسة وأخويا بيه كنت شاطرة فى دراستى.. مدياها كل وقتى ولدروسى بانتبه جت منين وإزاى وليه أسئلة دايما بقولها فى الحصص لأساتذتى عشان أفهم الدرس كله ومن جميع نواحيه ونجحت فى الثانوية العامة.. وبفضل دعاك يامه دخلت كلية تربية.. وأكتر من كده أنا عايزه إيه محتاجة طقم شيك ألبسه.. والتانى نص نص بس أبدل فيه مَراجع أبحاث وكتب.. وعارفة إن المصاريف زادت عليه كنت فى الصبح اتكسف لما أقوله.. يابا هات جنيه يدهولى وهو متغصب .. ده اللى كنت بشوفه من عينيه بعد التخرج اشتغلت فى مَدرسة والحَمد ليه، أستاذة اسمى فى حِتتي ده اللى بينادوني بيه رايحة جاية بكراريس العيال الشاطرة واللى مش هيه، أجتهد فى الشرح لأجل ما يحصلوا كلهم على ميه ميه وفمعاد القبض كنت طايرة .. لما خدت أول مرة 198 جنيه نِفسى اشترى مرة بلوزة .. وشنطة غالية من أم 45 جنيه يخليهملك ربنا.. جملة كانت بتقولها واحدة شايلة عيلها وبتشحت عليه أحط إيدى فى شنطتى.. أديها مرة ومرات ملاقيش اللى أتصدق بيه وأنا راضية بحالى دايما.. وباللى ربنا قاسملى بِيه. وف يوم سمعت إن ناس بتقبض فى السنة بالتسعة مليون جنيه إشاعات دى كنت بفتكر.. لحد ما اتأكدت وقالوا وفيها إيه ناس فى مجالها بتجتهد.. تُرقص تمثل مش عارفه حتى تتورب فى بطولة تكسب ..والشعب يفرح .. مع إن مفيش حاجة هتعود عليه من ساعتها كترت فى راسى الأسئلة.. زى برضه وقت التلمذة قوليلي بس مش عارفه إيه ؟؟ الفلوس دى جت منين وإزاى وليه؟ مش برده أكل ولبس ومكان نضيف بيعيشوا فيه لأ يا بنت الأكل فى بيوتهم حاجة تانية .. تختلف تمام عن صحن بامية سرفيس لرومى وأوزى مشوى واسكالوب بانيه والحلو من مونچينى أو لابوار وبلاش م الإليزيه والهدوم لابسينها ماركة.. فى البدل وف فساتين السواريه والمكان مش أى حاجة .. على الأقل ڤيلا فخمة أو شاليه مبيركبوش المترو زينا .. ولا تملى عينهم شيڤروليه يا ناس حرام اتقو ربنا.. ده البذخ اللى هتيجو فى يوم وتتحاسبو عليه.

أهم أخبار مصر

Comments

عاجل