جمال مبارك يفتح قلبه للحوار من خلف الأسوار

استفزتني كثير من الأفعال والخبايا والمخالفات والقضايا و الكثير مما ارتكبه حضرة البرنس جمال مبارك، فتمنيت لو أجري معه حوارا كي أسأله عن أشياء كثيرة... لماذا؟وكيف؟ومتى؟وأين؟ ثم وجدت نفسي على علم بمعظم ما أريد الاستفسار عنه غير أنه من المستحيل مقابلته أثناء هذه الظروف أو حتى قبل هذه الظروف! فما كان مني إلا تخيل ما يلي من الحوار... حوار أجرته الصحفية: صفاء عبد المرتضى • بطاقة تعارف... الاسم بالكامل: جمال الدين محمد حسني سيد مبارك العمر: من مواليد 1963م المؤهل الدراسي: ماجستير إدارة أعمال- الجامعة الأمريكية محل الإقامة: سجن طره المزرعة - مصر المهنة الحالية: عاطل • كيف ترى حُكم والدك للبلاد ثلاثون عاما من الحكم الفردي المطلق؟ هوه بابا كده عنيد ودماغه ناشفة وميحبش حد يفرض رأيه عليه أبدا. • هل كنت ترغب في رئاسة مصر من بعده؟ طبعا، وهي دي عايزه سؤال! • إذن كان هناك مخططا حقيقيا لتوريث الحكم؟ مش عارف انتو ليه مستغربين أوي من الموضوع ده، أيوه أبويه حكم البلد 30 سنة بحالهم يعني خلاص بقت ملكه، وأظن عادي يعني ان الابن يورث أبوه في كل أملاكه. • لماذا حدثت مشاجرة بينك وبين أخيك في قصر الرئاسة قبل تنحي والدك بأيام قليلة؟ احنا كلنا كنا مشدودين وعلاء أخويا أصله عصبي، قعد يقولي : عاجبك كده كل ده من تحت راسك انت والبلطجية بتوعك اللي مشغلهم في الحزب الوطني، مش كان المفروض أبوك دلوقتي يتكرم في أواخر أيامه بدل البهدلة والفضايح دي كلها، وعلى العموم أنا عاذره ومش زعلان منه ، إيه يعني لما يتخلق عليه شويه،ده مهما كان أخويا الكبير. • وكيف استقبلتم خبر تنحي أبيك عن الرئاسة؟ يعني تتخيلي هنعمل إيه، أنا كنت بأعيط وعلاء كان بيلطم وأمي قعدت تصوت. • ولماذا جاء قراره بالتنحي متأخرا رغم تصميم شعبه على الرحيل؟ ده كان عنده يدوس على مصر بالجزمة ولا يدهاش لحد تاني. • طيب نيجي لماما سوزان، مش عيب لما الست والدتك تخنصر من التبرعات التي جاءت لإنشاء مكتبة الأسكندرية وتضعها في حساب سري خاص بها؟ يا جماعة انتو فاهمين غلط، كل الحكاية ان دي كانت عمولتها من الصفقة. • وهل يمكن أن تصل العمولة إلى مبلغ 145مليون دولار؟ يعني عايزه حرم رئيس الجمهورية يكون "الكوميشن" اللي بتاخده كام يعني.. وبعدين المبلغ ده بالنسبة لليونيسكو ودول العالم المتقدم يعتبر "تيبس" بسيط جدا. • إذن مشروع القراءة للجميع كان مُدعما من خارج البلاد على عكس ما كنا نظن؟ يعني كنتو عايزنا نصرف عليكوا من جيوبنا كمان، ده انتو شعب طماع أوي. • سمعنا أن ما يطلق عليها "الوجبة الفسفورية" مثل الاستاكوزا والجمبري الچامبو وبعض أنواع السمك غالية الثمن كانت حكرا على مُحافظي المدن الساحلية وكبار رجال الدولة حتى أن صيدها كان مُحرما على الصيادين في مصر!!! هل هذه المعلومات صحيحة؟ صحيحة جدا. • ولم هذا الطغيان إذن؟ ده مش طغيان ولا حاجة وبعدين بلاش تستخدمي الكلام الكبير ده وتدي الموضوع أكبر من حجمه، كل الحكاية إن كبار رجال الدولة لازم يتغذوا كويس عشان يقدروا ينهب...يشتغلوا، ويهلب...ويتكتكوا، دي ناس دماغتها متكلفة ولازم الدولة تخصخص قصدي تخصص لهم كل اللي يحتاجوه مهما كان وبأي سعر وبأي طريقة كمان ... أمال انتِ فاكره إيه،وبعدين بقه قوليلي هما الغلابة محتاجين الوجبات الفسفورية في إيه مش مكفيهم الفول المدمس والبصارة والكشري والطعمية واسمها إيه دي .. المسقعة والعدس كل ده سايبينهولهم وواخدين بس الوجبات الفسفورية ، ولا كمان هتبصولنا في اللقمة اللي بناكلها، ده انتو شعب طفس صحيح. • بمناسبة "العدس" وصل سعر الكيلو منه إلى عشرة جنيهات، ألا ترى أنه من الإجحاف أن يصل الغلاء حتى إلى أكل "الغلابة"؟ يا سلام ،إيه يعني كيلو العدس بقى بعشرة جنيه ، هي العشرة جنيه دي بتسميها فلوس. • العشرة جنيهات قد تكون أقل من يومية الكثير من بسطاء المصريين! هوه يعني لازم نكون كلنا أغنيا، أمال إزاي هيبقى فيه كناس وزبال وماسح أحذية،هي دي سُنة الحياة إن يبقى فيه سيد وعبد. • هناك رأي قائل: بأن التجربة الاقتصادية في عهد أبيك جسدت الرأسمالية المتوحشة... فما رأيك؟ هما كده المصريين هوالين.. و بيحبوا يبالغوا في كل حاجة. • ما هي البنوك التي تتعاملون معها؟ والله احنا بنتعامل مع أكبر بنوك العالم في كل مكان، يعني عندك مثلا بنك "باركليز الدولي"، بنك"يو بي إس"السويسري وغيرها في "مانهاتن"و"بيڤرلي هيلز"وكاليفورنيا .... وكفايه بقى عشان أقدر آخد نَفَسي. • أخطأ المصريون في تحديد حجم الثروات التي بحوزتكم حتى فوجئوا أنها أكبر بكثير مما كانوا يعتقدون؟ تقدري تقولي إن ده ضيق أفق من المصريين. • أحيانا نسمع أن ثرواتكم تصل إلى 70مليار دولار وأحيانا 620ومؤخرا سمعنا أنها تصل إلى ما يزيد عن 700مليار دولار... أين الحقيقة؟وكم يصل حجم ثروتكم بالضبط؟ الله وأكبر في عنيكوا كلكو، بصي بقى دي خصوصيات ، انت تحبي حد يسألك انت بتاخدي كام في الشهر، أنا بعتبر إن السؤال عيب أوي ومينفعش الكلام فيه تمام زي المحرمات التلاتة اللي علمناهلكوا في المدارس. • هل من الممكن استرداد شيء من هذه الأموال إلى المصريين مرة أخرى؟ ده لما تشوفوا حلمة ودنكوا. • إذن! لم تم تجميد أموالكم بالكامل؟ ده انتو شعب حقود بشكل، على فكرة أنا وأمي من ساعة ما سمعنا الكلام ده وإحنا بندعي تتجمد الميه في عروقكم. • لماذا قمت بسحب75 طنا من الذهب المخزون لدى مجلس "الاحتياطي الڤيدرالي"في الولايات المتحدة؟ لما الزمن غدر بي وبعيلتي، قلت أسحب الدهب ده وأهي فلوس متجمدة تنفعنا وقت اللزوم عشان منمدش إيدنا للي يسوى واللي ما يسواش. • لماذا كنت تقيم أنت وأخيك علاء شركات مع عدد كبير من رجال الأعمال والموردين والمصدرين والمستثمرين حتى أن بعضها جاء بالقوة وفرض النفس؟ هو انت أول مرة تسمعي عن الإتاوة ولا إيه، الإتاوة دي يا ماما موجودة في كل عصر وفي كل زمان وهي دي بقى الإتاوة المودرن، مش بد ما نمسكلهم الشوم زي فيلم "التوت والنبوت". • لماذا كنتم تلجأون إلى استغلال السلطة والنفوذ في طول البلاد وعرضها؟ قال على رأي المثل: قالوا لفرعون إيه فرعنك؟ قال: مالاقتش حد يردني. • هل تتذكر تاريخ زواجك؟ طبعا وده يوم يتنسي! كان يوم 4مايو 2007وكان موافق يوم جمعة كمان، وكان حفل أسطوري مفيش مصري شاف ولا هيشوف حفل زيه، أمال انتو فاكرين إيه. • هل صحيح أن حماك"الجمّال" تحمل تكاليف الشبكة والفرح؟ آه.. طب ودي فيها إيه! • ألا تعتبر أن ذلك يدعو للاستغراب على ابن الرئيس؟ لأ .. ماهو معملش كده لوجه الله؛ ده بابا إداله 1700فدان بأبو رواش هدية، غير بقى إن غلاوته زادت عند بابا حسني واتفتحت أدامه كل الأبواب المقفولة، بالظبط زي ما يكون معاه "المصباح السحري"،وكفايه إن بعد ما اتجوزت بنته بقى أكبر حيتان الاستثمار في مصر. • هل قصة محاولتك للانتحار صحيحة؟ أنا كنت متضايق أوي ساعتها وحاسس بيأس وإحباط شديد من كل اللي بيحصل حواليه في الأيام الأخيره دي، فاشتريت سم فيران عشان أخلص من حياتي وأريحكم مني، بس ماما لحقتني في آخر لحظة وضربتني على إيدي وقالت لي كِخ كِده. • لم تلفيق هذه القصة المفتعلة في أحداث مصر والجزائر؟ أنا هقولك ليه: أنا عملت كده عشان الشعب المصري كان علطول قارش مَلحتي،كان دايما يبصلي على إني دمي تقيل ورخِم، فكنت بحاول أتقرب لهم عشان يحبوني، يعني الحق عليه يعني. • ما رأيك في إطلاق الرصاص على المتظاهرين في 25 يناير؟ يعني نعمل لهم إيه! كنا عايزين نسكتهم بأي شكل. • تقوموا تدوسوا عليهم بالعربيات وتقتلوا شباب زي الورد! عادي.. عادي. • لكن هذا نتج عنه مقتل 800 شخص وإصابة أكثر من 5 آلاف آخرين! يا اختي المصريين أكتر من الهم ع القلب، إيه يعني لما 800 ماتوا، أهو يخفوا من الكثافة السكانية شوية. • جمال مبارك، ماذا تفهم في أمانة السياسات؟ ولا حاجة، بس عمو صفوت قال لي امسكها انت بس دلوقتي، وبعدين أنا هبقى أعلّمك كل حاجة في وقتها. • كيف استقبلت خبر حبسك أنت وأخيك وأبيك 15 يوما على ذمة التحقيق؟ أنا كنت حاسس إن ده هيحصل؛ لأني كان كل شويه يجيلي كابوس أشوف فيه خالد سعيد جايللي وبيقوللي : ربنا هينتقم لي منكم وبكره تشوف يا جمال، والكابوس المزعج ده اتكرر أكتر من مرة وبكذا شكل بس المضمون كان واحد،لكن علاء ماكنش مصدقني لأنه علطول متفاءل، فأول ما سمع بموضوع الحبس ده اتخرس وجاتله حالة ذهول، أما أبويا فالكل عارف إنه وقع من طوله ونقلوه على مستشفى شرم الشيخ العسكري... يا ساتر عليكوا تموتوا في المصايب. • ماذا كان شعورك أنت وعلاء وأنتما داخل سيارة الترحيلات إلى سجن "طره المزرعة"؟ لأ بجد ماكنش يخطر يوم على بالي إن احنا نتبهدل كده، طول عمري أسمع إن الزمن غدار، بس كنت باسمع بس وعمري ما كنت أتخيل إني هجرب وأدوق غدره زي الناس اللي كنا بنسمع عنهم في الحواديت. • كلمات توجهها إلى كل من.... - أحمد عز: معرفوش • لكن أنا سمعت أنه ذراعك اليمين! ما قلت: ما أعرفوش. - حبيب العادلي: ده شيطان، وعلى فكرة هو اللي وز بابا عشان يقتل المتظاهرين ويخوف الناس ويفض كل حاجة، كان عامل فيها فِتك بغباوته. - أحمد نظيف:اسم على مسمى؛ نضف حاجات كتير في مصر أولها بطون المصريين من الوجبات الدسمة عشان يحميهم من السمنة أو بِعد الشر الكولسترول، وكان عامل قرية ذكية غاية في الروعة تليق بمكانة مصر التاريخية بيحكم منها البلد عشان يشرفنا أدام العالم. • أيوه بَس ده كان بيوقف المرور 4مرات في اليوم!!!! معلش أونكل نظيف كان بيبقى عايز يدخل الحمّام وكان عنده رُطوبة زايدة اليومين اللي فاتوا دول، وكان معروف عنه إنه بيقرف أوي وما بيعرفش يعمل ببيه إلا في الحمّام الخاص بيه. - صفوت الشريف: لأ بصراحة الراجل ده أفضاله كتير أوي عليّه وعلى اللي جابوني وعلى كل رؤساء مصر السابقين، وقِدّر إنه يدير العملية السياسية في مصر بمنطق مخابراتي فيما يزيد عن رُبع قرن. • ولماذا قيل عنه أنه چنرال الدعاية السوداء؟ هُما قالوا عليه كده عشان قضيته الشهيرة المتعلقة بانحرافات جهاز المخابرات عام 1968، ويمكن فيه ناس غيرانة منه عشان عبقريته اللي بيتميز بها في ضمان الاستمرار وقدرته الفائقة على الانحناء لكل العواصف وإثبات الحضور، وعى فِكرة عمو صفوت كان من الناس القريبين أوي من بابا الحاج. - حاتم الجبلي: معروف عنه النزاهة. • وما قولك في تسميته"مصاص دماء الغلابة"! شوفي مفيش حد خالي من الألقاب وده كان مجرد اسم للشهرة أو الدعاية. - فتحي سرور: رجل عبقري ومتسامح ومُعمّر. • هل لنا من توضيح ! عبقري لأنه كان فقيه السُلطا.. قصدي بابا، بس حرام طلعوا عليه بعد كِده إنه "قانونجي السلطان الفاسد" ويمكن الناس تكون واخده على خاطِرها شوية لأنه أول من استعان بالبلطجية للسيطرة التامة على دايرة السيدة زينب، أما متسامح لأنه كان بيسمح لأعضاء المجلس بالنوم أثناء الجلسات والضرب بالأحذية وسَب الدين ده غير أنه لم تسقط حكومة ولم يُحاسب وزير في ظِل رئاسته للبرلمان، ومُعمّر لأنه كان واخد بابا مثله الأعلى وتولى رئاسة مجلس الشعب لمدة تزيد على عشرين عاما. - محمد البرادعي: الراجل ده دمه تقيل على قلبي وما بقبلوش. • جمال مبارك، أول ما يطرأ على ذهنك عند سماعك الكلمات التالية...  الفساد: مبدأ.  الظلم: وجهة نظر.  سداد ديون مصر: واحنا مالنا.  إلغاء وزارة الإعلام: خسارة كبيرة.  تزوير الانتخابات: إن كان عاجبكم.  المتظاهرون: عايزين حَش رقبتهم.  ميدان التحرير: نفسي أولع فيه.  25 ينا.. : بس متكمليش أنا خلاص لغيت رقم 25 ده من كل حساباتي عشان بقيت باتشاءم منه، ولغيت كمان شهر يناير من شهور السنة، ويوم الجمعة من أيام الأسبوع وكفاية كده بقى وارحمونا. • وأخيرا: كلمة توجهها إلى شعب مصر؟ عايز أقول لهم خلاص استريحتوا قعدتوا تنقوا وتقولوا خليفة أبوه في الحُكم لحد ما الشُغلانة طارت من إيدي وبقيت عاطل ومش لاقي شُغل.