الإعتصام ع الرخام

 | أخر تحديث: 26/05/2010 05:54 م السادة المبجلون رؤساء الجمعيات الأهلية بيطالبوا الحكومة بتطوير رصيف مجلس الشعب .. ده بدل ما يطوروا بيت ام حمادة اللى ساكنة فى بيت مهكع فى عين شمس وسلالم البيت بايشة ما علينا .. المهم الناس دى كتبوا مذكرة طويلة عريضة للحكومة انها تطور السلالم ورصيف مجلس الشعب لانها حق لكل فئات الشعب للاقامة عليها املاً فى حل مشاكلهم عن طريق الاعتصام بعد ان فقدوا الامل فى فى ممثلى الشعب ، طبعا انا رفعت سماعة التليفون على طول وطلبت ام حمادة وقلت لها أنسي .. بس ربنا كبير والحقى لك سلمة قبل الدنيا ما تتزحم . الدكتورة وفاء منيسى رئيسة ادارة جمعية رواد البيئة كان فيها الخير وصرحت ان من حق كل مواطن مصرى –غير مصرى طبعا لا- ان يجد مكانا مناسبا على رصيف مجلس الشعب لذلك لابد ولا مفر من تطوير الشوارع الرئيسية امام مجلس الشعب ليتحول الرصيف – وخد بالك معى فى الحتة اللى جاية – الى متعدد الطبقات يعنى يكون الرصيف على درجات مختلفة من التشطيب ومن الرخام ومن البلاط العادى حتى يتناسب مع طبقات الشعب المختلفة ,, اه احسن ام حمادة يجى فى بالها انها هتاخد رصيف رخام ولا حاجة لا انسى يا ماما ، الرصيف هيتعمل حسب المستويات لو سعادتك قاضى ولا محامى ولا دكتور ولا حتى صحفى ممكن تلحق سلم او رصيف رخام بس طبعا فيه رخام درجة اولى وتانية وتالتة .. لكن بقى لو انت عامل تشوف لك رصيف ببلاط عادى وتحط لسانك جوه بقك وتحمد ربنا . بصراحة انا قولت يمكن اكون ظلمت الناس العظماء دول .. فنزلت روحت مجلس الشعب اشوف يمكن فعلا الرصيف بقى خلاص مش نافع .. اصلى من زمان معملتش اعتصامات .. بصراحة مقدرتش أشوف حالة الرصيف او السلالم لانها كانت مش واضحة من عدد الناس الكبير .. فقلت افرح الناس الغلابة دول واقول لهم على الاقتراح الجامد بتاع الرخام والبلاط .. وياريت ما قلت ..الناس لم تستوعب الجهود الجبارة لرؤساء الجمعيات الاهلية وبيقولوا انهم بدل ما يحاولوا يحلوا مشاكل الشعب بيتكلموا في حاجات غريبة مالهاش لازمة .   اما عم سيد وهو عامل فى شركة مصنوعات غذائية فكان عنده اقتراح تحفة بانهم يعملوا السلالم متحركة ويخلوا الادوار السفلى لكبار السن وذوى الاحتياجات الخاصة اصل ممكن الحكومة تقطع الكهربا ومفيش مانع لو نفتح كافيتريات ومطاعم احسن الناس هنا بتقعد بالشهور .. طبعا انا وصلت اقتراح عم سيد لدكتورة وفاء عشان تضمه للمذكرة القادمة وبصراحة قلت بالمرة اتوسط لام حمادة فى سلمة رخام احسن الست مريضة مش هتستحمل البلاط العادى فى البرد.