محدش ليه فيه!

 | أخر تحديث: 26/05/2010 05:19 م تفتكروا الجماعة الخواجات بتوع بلاد بره قصدهم ايه يعنى لما يعملوا دراسة مخصوص عنا بتقول " المعلم غير الكفء قد يفسد جينات الذكاء لدى التلاميذ" تقدروا تقولوا لى هما مين عشان يفتوا الفتوى دى على اساس انهم متقدمين ومتطورين وفاهمين فى كل حاجة .  المهم ان اللى قال الكلام ده شوية علماء نفس امريكيين .. و كانت حجتهم انهم علموا دراسات واحصائيات على مدارس العالم العربى و اتضح اننا متخلفين وان اهم اسباب فشل التعليم فى عالمنا العربى العريق المدرس .. يعنى فيها ايه لو كانت ضغوط الحياة تضطره إنه يطلع القرف على العيال فى الفصل .. عادى جداً ، المدرس والطلاب وجهان لعملة واحدة فعملته وهو حر فيها يضربها على وجهها يكسرها نصفين يديها بالشلوت .. هو حر ! . كله كوم .. والتخاريف اللى قالتها الست اللى اسمها جانيت تايلور مديرة الدراسة اياها كوم تاني .. بتقول يا جماعة ان التعليم الكفء ضرورى لكى ينشىء الطفل سويا عقليا وان الطفل عامة يولد ومتوسط ذكاءه يتراوح بين 70% الى 87% والمتوسط ده مرن جدا بيكون قابل للزيادة والنقصان على اساس نوعية وكفاءة التعليم .. يعنى لو ربنا راضى على العيل من دول وامه وابوه بيدعو له هيكرمه بمدرس كفء يرفع معدلات الذكاء اللى عنده ، اما بقى لو كان واد " فقري من يومه " وابوه وامه مخنوقين منه هيكون من نصيبه مدرس ح يخليه يكره عيشته ويشربه العذاب كاسات ! . هذا ما نشرته صحيفة " الموندو" الاسبانية عن علاقة جينات الذكاء بالتعليم الكفء مع ضرب مثال بالعالم العربى كنموذج للتخلف وتعقيد التلاميذ .. عموماً ولا تزعل نفسك يا استاذ .. اولادنا واحنا احرار فيهم يتولدوا اذكى اطفال العالم وبقصد او بدون قصد نجعلهم اغبى أطفال العالم .. محدش ليه فيه ! .