الرئيس القادم على «تويتر»: مش منوفى.. معاه أجندة.. لا يستقبل المنتخب

مايكونش من المنوفية ويفطر كل يوم على عربية الفول وينزل وسط البلد والمهندسين يدور على ركنة لعربيته وميعديش الستين سنة.. هكذا اشترط وحدد عدد من أعضاء موقع التواصل الاجتماعى «تويتر» رئيس الجمهورية القادم، وخصصوا جروباً على الموقع تحت عنوان «الرئيس القادم». وطالب الشباب بتخصيص يوم كل أسبوع يقابل فيه الشعب ويسلم على اللى يروحله من الناس ويستلم منهم المظالم بنفسه.. ميقولش أجيبلكم منين انتوا بتخلفوا كتير ولا تكون مراته سيدة فاضلة وكمان بيربى عياله، مش بيربى كلاب، يحضر كل حفلات التخرج فى الجامعات، وميعديش الـ60 سنة. وبشكل ساخر قال الشباب إنه لو راح أديس أبابا وحد كان عايز يغتاله ورجع يحكيلنا ولو عمل فيها مغامرات سندباد هنغتاله إحنا، لازم يبقى معاه أجندة ويكون أكل من كنتاكى التحرير.. ولاده يتعلموا فى مدارس وجامعات الحكومة.. ويتحكم عليه يتفرج على قنوات النيل والجرائد القومية علشان يتعلم الأدب.. يقبض مرتبه من صراف فى التحرير من إيراد موقف عبدالمنعم رياض عشان يبقى يورينا هايحولهم إزاى على سويسرا. وأكد الشباب على الموقع ضرورة ألا يستقبل الرئيس القادم منتخب الكرة حتى لو فزنا بكأس العالم ونحط قانون أن الرئيس يعدم بالرصاص على يد الزمر بعد فترة الحكم ولو مات وهو فى الحكم بلاش عبارات فقدت مصر وفقدت أم ترتر عشان مصر كل ثانية بتفقد كتير ماجاتش عليه يعنى نبقى نقول ربنا خده وأن يعرف أن الشعب كله حاطه فى دماغه ومراقبه ولو عمل أى حاجة هنوريه النجوم فى عز الضهر.. يلغى زراعة محصولى الكوسة والقرع.. وما يطلعش فى أول صفحة فى الجورنال، ممكن يطلع مرة فى الشهر فى آخر صفحة فى النكتة، أو باب الوفيات.