المحتوى الرئيسى

من الأعماقعيدك يا امي‮ ..‬عيــدين

03/20 22:45

‮..‬النهار ده عيد الأم عيدين‮ .. ‬الفرحة فرحتين‮ ..‬عيد أمي الكبيرة مصر‮ ..‬وعيد أمي الحبيبة اللي عايشه في الصعيد‮..‬أنا فرحان إني عشت وشفت اللي حصل في مصر يوم الاستفتاء‮..‬الملايين خرجوا وأنا معاهم واعترف أنها المرة الأولي في حياتي اللي ادخل فيها لجنة انتخابية واقف امام الصندوق‮ .. ‬لم اكن احمل يوما بطاقة انتخابية ولم اسع لاستخراجها‮  ‬الا منذ ايام‮.. ‬ليه ؟ لاني كنت عارف اللي فيها وانهم بيقومون بالواجب‮ !!..".. ‬وقفت نص ساعه في الطابور وكنت فرحان‮.. ‬شفت رئيس الوزاره بيستأذن الناس اللي واقفه في الطابور علشان يدخل اللجنه يصوت‮ ..‬شفت محافظ القاهرة لما الناس كانت هتاكله وادو له درس لن ينساه لانه انتهك الطابور رغم انه ذكي وحاول يبرر موقفه بانه كان داخل يمر علي اللجنه‮.‬النهارده كمان عيد الام‮ ..‬عيد امي اللي في سوهاج‮..‬باقول لها كلمات الاغنية التي اعشقها للراحلة فايزة احمد‮ " ‬ست الحبايب يا حبيبة‮ ..‬يا اغلي من روحي ودمي‮ ..‬يا حنينه وكلك طيبه يارب يخليك يا امي‮ ".. ‬امي الحبيبة نفسي اترمي في حضنك زي زمان وتمسحي بايدك علي شعري كل ههمومي‮ ..‬كاني شايفك دلوقت وانت سهرانه‮  ‬معايا طول الليل في عز البرد وانا بذاكرعشان خايفه انام وتحرقني‮ " ‬لمبة الجاز‮ "‬قبل ما تدخل قريتي عنيبس الكهربا‮ ..‬سامع صوتك وانت بتقولي لي عايزاك تطلع الاول عشان ابوك شقيان عشانكو‮  ‬وعاوزاك تفرحه‮ .. ‬شايف دموع الفرحه في عنيكي لما نجحت بتفوق وقلت لي‮ " ‬رفعت راسنا‮ ".. ‬امي الحبيبة كل سنه وانت طيبة‮ ..‬الفرحه السنه دي فرحتين‮.. ‬لا تحرميني وانا عايش بدعواتك ودعوات ابي الحبيب‮.‬

أهم أخبار مصر

Comments

عاجل