المحتوى الرئيسى

إحنا بتوع التحرير بقلم:اسلام فتحى

03/20 21:21

تحرك علي الشريط الإخباري لقناة الجزيرة خبر عاجل : قرر الرئيس المصري في حدث تاريخي عقد مؤتمر جماهيري في الصالة المغطاة مع الشعب والقوي السياسية للوقوف علي حقيقة مطالبهم التي دعتهم للتظاهرات وإرضاءً لشباب الفيس بوك . بعد دقائق من إنتشار الخبر الذي سري كالنار في الهشيم ،تجمهر عشرات الآلاف من الشعب بداخل وخارج الصالة المغطاة . تحرك موكب الرئيس ،هذه المرة بالطائرات ،ليهبط من السماء في إشارة ما وكأنه القائد الملهم المنتظر . بدت الهتافات في الصالة والشوارع صارخة ،وبدت كأنها موحدة دوت الهتافات في الصالة وخارجها .. احنا بتوع التحرير ..! احنا بتوع التحرير ..! ارحل .ارحل ..ارحل انفعل الزعيم : نحن الحزب الأقوي ليس فقط لأننا الأكثر عددا والأكثرمعايشة لنبض الشارع لا دا كمان لأننا واخدين الشعب في حضننا طول عمرنا.( تعالي لحمو يا شعب) الأكثر إلتحاما مع الناس (لازقين جامد قوي ). الأقدر علي تحديد أولويات ومزاج المواطن المصري..عايز حشيش وماله ..عايز بانجو نديله ..عيش بمساميره موجود ..إحنا بتوع الديموقراطية وعنينا الاتنين للمواطن الفقري المطحون ..آه أومال ايه ؟. مصر بتتقدم بينا..(بالحزب يعني).. اقتصادها فـُل الفُـل، مستوي المعيشة فيها بقي لفوق لفوق لفوق ..( من كتر ماهو لفوق المواطن أصيب بمرض جديد اسمه الأليطة) ،متوسط الدخل الحقيقي للفرد زاد 500% ( يلا خلي الشعي يهيص). 12 مليون فرصة عمل شهريا لدرجة ان الشعب كله اشتغل ومش لاقيين حد نـشتغله . الغينا البطالة من أجنداتنا ومش لاقيين حد يشتغل. المصانع بقت بتنش واضطرينا نستورد عمالة من أمريكا وأوروبا . الجنيه المصري بقي يساوي 15 دولار وربع وعشرين سنت في أربع سنوات فقط ( ولسه ..تيت تيت..ولسه..تيت تيت). المواطن – إتشهيص- جامد قوي في الخمس سنوات الأخيرة ، ومع ذلك بنسمع أصوات( فاجرة ..أصوات داعرة ).. تقول إنها مش حاسه بالتنمية وعجلة التوكتوك اللي ماشية بينا لقدام ( أما عالم جبلات صحيح ) كأننا - بنشهيص – في شعب تاني غيركم وكأن الناس اللي اتنغنغت دي من بلد تانية . ديون مصر الخارجية كلها اتسددت ،وبندي أمريكا دلوقتى معونة مليار إلا ربع جنيه سنويا عشان نرفع اقتصادها. الموظفين دخلهم زاد . الشحاتين دخلهم زاد. الحرامية دخلهم زاد. المديكال في شركات الأدوية دخلهم بقي الضعف، كل مديكال بيدخل علي ماكينة الصرف الآلي بعربية نص نقل عشان يحمل القبض والحوافز. زادت رواتب الأطباء من 100% الي 600%. كل القري اتعمل فيها صرف صحي . كل القري دخلت فيها المياه والكهرباء . لغينا الضرائب..وخلاص استكفينا ومش هنفوترك تاني. برَّق الزعيم : لقد قمنا بالثورة من أجلكم ..وعشان خاطر عيونكم الدُبّـلـي، وانا كلي للشعب . صاح الزعيم : أنا التاريخ ..! كرر الصياح : أنا الزعيم .. ! فلماذا يثور الفيس بوكيين إذن ؟ ( عليكم اللعنة أينما عملتم sign in ). تعالت هتافات الشباب الرافض لخطاب الرئيس بقوة .. احنا بتوع التحرير ..! احنا بتوع التحرير ..! ارحل .ارحل ..ارحل ثورة في تونس ..ثورة في مصر ثورة ..ثورة ..حتي النصر..! غضب الزعيم واحمرت وجنتيه ،فوقف احد الشباب الفيس بوكيين وقال : لماذا قمنا بالثورة ..؟ ( أما احنا عالم بتستهبل صحيح ) اقولك يا ريس ليه قمنا بالثورة ومتزعلش.؟ لأننا شعب متمرش فيه النغنغة والعز اللي كنت سيادتك معيشنا فيهم قمنا بالثورة . لأننا شعب مارس دوره كقرد يحركه القرداتي لسنوات عجاف حملنا فيها الهم (أكوام أكوم) قمنا بالثورة . بس عايز الحق ولا ابن عمه .؟ لأننا ليس شبابا تافها، وعقولنا ليست خاوية ،وعزيمتنا قوية ،وأرضنا صلبة ،قمنا بالثورة. ليس لننكر فيضك وكرمك ونغنغتك اللي مرمغت اللي جابونا فيها لسنوات، لا طبعا العفو ، ولكن لنقول لك كفايا نغنغة بقي نبوس إيديك ، عايزين شوية ضنك بقي .. يارب شوية فقر وبطالة بقي..زهقنا من النغنغة .. احنا شعب مبيتمرش فيه الباتون ساليه والكرواسون ياريس .. شوف لك شعب تاني نغنغه ودلعه بقي ، شعب تاني يقدرك أكتر مننا. بتسأل قمنا بالثورة ليه ؟ قمنا بالثورة علشان نقول لك إننا منستاهلكش يا ريس .. إرتحت ؟ إحنا بنعكنن عليك ونفور دمك ،وانت مش ناقص . احنا نكديين صدقني وانت جربت بنفسك 30 سنة ..مزهقتش بزمتك ؟ طول عمرك حنين وقلبك كبير، واحنا ولاد كلب جاحدين. طول عمرك قلبك واكلك علي الشعب واحنا كافرين. ناسيينك حتي من دعائنا وصلاتنا . ولا واحد فينا دعالك في صلاة الجمعة اللي فاتت ياريس .. اقولك الزغلول الكبير بقي؟ حتي الإمام غشك ودعي للشعب ونسيك وهو ساجد . احنا شعب عامل زي القطط بياكل وبينسي بسرعة . عمرك ما عزبتنا في سجونك عشان فـكّـرْنا . ولا سوط جلادك معَلِمْ علي جسمنا، ولا فكرت يوم تدينا علي قفانا،عمرك حتي ما حنيت ضهرنا ،شعب قاسي ، واطي ميستاهلش ملاك زيك ..! ولا واحد سمي ولاده علي اسمك ،ولا فنان تشكيلي عمل لك تمثال،.ولا واحد فينا معلق صورتك في غرفة نومه ، الشهادة لله مفيش غير الوزراء بتوعك ..كل واحد معلق صورتك في غرفة نومه وفي الصالون وفي الحمام كمان ياريس،وعامل صورتك خلفية للموبايل والاب توب بتاعه وبيغلط في اسم مراته وبيندهلها باسمك . ولا واحد فينا وطني ،احنا ناكرين للجميل صدقني منستاهلكش . هريتنا تليفونات ورن ومسجات واحنا شعب واطي مبيردش عليك. عمرك ما عرفت حالنا من التقارير ..ودائما تتصل بينا واحد واحد عشان تطمئن علينا ،واحنا مدينها طناش ولا بنعبرك. مش عارف عملت لنا إيه عشان نعاملك كده ؟ بتسأل عملنا الثورة ليه ؟ لإن ولا واحد فينا وطني وكلنا بتوع أجندات وكنتاكي ، كلنا معارضة ياريس، شعب بتاع فيس بوك صحيح . احنا منستاهلكش صدقني ..أقولك حاجه علشان ترتاح ، إحنا بتوع التحرير ..! الكاتب الساخر/اسلام فتحى

أهم أخبار مصر

Comments

عاجل