المحتوى الرئيسى
worldcup2018

صباح الورد‮.. ‬حتـــي القــــرد‮!‬

03/09 14:55

قال روكا الحرامي للملك رمسيس الثاني‮: ‬امبارح رُحت قهوة عنتر أشد نفسين وأرُم عضمي بكباية حلبة حصي‮ . ‬بضرب بعيني جوة القهوة شفت القرد ميمون قاعد وحاطط رجل علي رجل ورابط عينه بشراب قديم وبيشرب شيشة‮ . ‬كان بيتفرج ع القذافي في التليفزيون‮ . ‬وكل القذافي ما يلعَّب حواجبه ويقول‮ »‬زنجة زنجة‮« ‬ميمون يسخسخ علي روحه من الضحك‮ . ‬قمت من مكاني وسحبت الكرسي معايا وقعدت جنبه وسألته فين معلمك‮ ‬يا سعدون‮ ‬،‮ ‬ورابط عينك ليه لا مؤاخذة وفين السلسلة اللي كانت حوالين رقبتك من ساعة ما اتولدت ؟ ميمون مسك الماشة وقعد يرص النار علي كرسي المعسل‮ ‬،‮ ‬وشد نفس‮ ‬غويط وقال لي‮ : ‬كان زمان يا معلم روكا،‮ ‬البلد ما عادش فيها حد متسلسل من رقبته‮ . ‬وبعدين نده للواد دقدق وطلب لي كازوزة علي حسابه‮ ‬،‮ ‬وحط اللاي ع الترابيزة وحكالي حكايته‮ ‬،‮ ‬قال لي‮ : ‬أنا من ساعة ما هربت من جنينة الجيزة وأنا عايش مع سعدون ع الحلوة والمرة‮ .. ‬وياما البغل بتاع فرحات العربجي حرضني عليه‮ . ‬كان بيقول لي فك السلسلة‮ ‬يا كروديا واهرب وعيش حياتك‮ . ‬قلت له نفسي أعملها يا بغل بس ما اقدرش‮ . ‬لو فكيتها أحس بالغربة ويكفيك شر الغربة‮ . ‬ما ينفعش أفكها وأنا شايف كل البني آدمين متسلسلين من رقبتهم وماشيين حلوين ورا القرداتي وبيسمعوا كلامه‮ ‬،‮ ‬يشاور بالعصاية ويقول يمين يروحوا يمين‮. ‬يقول شمال يروحوا شمال‮ ‬،‮ ‬ولما يطبل‮ ‬يتحزموا ويرقصوا بالصاجات‮ .‬قال الشيخ‮ ‬غريب‮ : ‬ويعملوا عجين الفلاحة‮ !‬قال روكا للملك‮ : ‬قلت له وبعدين يا ميمون،‮ ‬قال لي لما مصر كلها فكت السلسلة فكيت سلسلتي‮ ‬،‮ ‬وقلت للمعلم سعدون ما تخافش‮ ‬،‮ ‬مش ح أسيبك لوحدك‮ . ‬ح نشتغل مع بعض واتفرج علي حلاوة شغلي وأنا حر من‮ ‬غير سلسلة‮ . ‬وفي يوم فتحت الجرنان لقيت صورة كبيرة لطباخ الانتخابات بتاع الحديد‮ . ‬كان بيتنطط جوة القفص والناس ملمومين حواليه ومعاهم موز،‮ ‬دققت في وشه وتقاطيعه المسمسمة لقيته يشبه حد أعرفه كويس‮ ‬،‮ ‬واحد بشوفه كل يوم بس اسمه ما جاش علي بالي‮ .‬قال الشيخ‮ : ‬يخلق من القرد أربعين‮ !‬قال روكا للملك‮ : ‬لما القعدة احلوت ميمون نده لدقدق وقال له نزِّل كرسيين تفاحة علي حسابي‮ ‬،‮ ‬وكِّمل كلامه‮ . ‬قال لي‮ : ‬وأنا بحلق دقني تاني يوم الصبح بصيت في المراية افتكرت علي طول بتاع الحديد شكل مين‮ . ‬أتاريه شكلي الخالق الناطق‮ . ‬زعقت بعزم صوتي وقلت للمعلم سعدون فُرجت‮ . ‬سبسبت شعري ولبست تريننج أبيض ونزلت مع سعدون ميدان التحرير‮ .. ‬وهات يا شغل‮ . ‬الناس يسقفوا وسعدون يطبل ويغني‮ »‬هز يا وز‮.. ‬دلع نفسك يا ابن العز‮« . ‬وعملت نمر جديدة لانج‮ . ‬عجين الانتخابات‮ ‬،‮ ‬ونومة المسجون‮ ‬،‮ ‬وزنقة الحرامي‮ ‬،‮ ‬وخيبة المرتشي‮ . ‬واستنيت حد يحدف فلوس ما حدفوش‮ . ‬بصوا في وشي وصرخوا وقالوا في حس واحد‮ : ‬هو بغباوته ونتانته وتناكته‮ . ‬وعينك ما تشوف الا النور يا معلم روكا‮ . ‬الشباشب والجزم نزلت علي دماغي ترُخ‮ .‬قال الشيخ‮ : ‬ومن ساعتها رابط عينه‮ !‬

أهم أخبار مصر

Comments

عاجل