المحتوى الرئيسى
worldcup2018

أنا من حـــــــــزب الكنبــــــــــــــة

03/07 14:55

أنا من حـــــــــزب الكنبــــــــــــــة كتبه: محمد ممدوح - (هذا المقال يعبر عن رأي كاتبه فقط) 146 من على كنبتي الوثيرة الأثيرة و من على لابتوبي أحب إني أوجه بيان للشعب العظيم. هو صحيح البيان مش هيحتوي كلام كبير من نوعية إلى الأمام إلى الأمام و لا هقلكم فهمتكم و لا هقلكم أنا عاوز أموت على أرض مصر ما بلاد الله واسعة يعني بس هحب أقلكم حجات كتير أوي أوي مهمة و لا تقل أهمية عن ما قمتم به من ثورة. أستعنا على الشقا بالله.مصر دي كبيرة أوي و شعبها كبير أوي صحيح أن أغلب ناسها بيحبوها بس للأسف فيها ناس بتحب نفسها أكتر و أكتر و عشان كده إدينا فرصة لأعداء الثورة إنهم يخلونا نبطل على الحاجة العظيمة اللي كلنا عاوزينها و وصلتنا لإننا نبص على 100 جنيه و لا ألف جنيه في حين إن البلد لما تشتغل هتتظبط و الدنيا هتحلو أوي أوي و القشية هتبقى معدن.وعشان مصر دي مجتمع كبير و بلد كبيرة و ناسها كتيرة فهي محتاجة نظام و النظام محتاج قوة و القوة محتاجة عدل عشان يعرف يقلها إيه اللي صح و إيه اللي غلط و عشان كده مش كل ظابط بوليس هوا ظابط أمن دولة و مش كل عسكري هوا عسكري أمن مركزي و في إيده عصاية و عاوز ينزل فينا ضرب  عشان كده أعداء الثورة و ما أكثرهم عاوزين البوليس يفضل بعيد و الناس تفضل خايفة و الحياة تفضل منيلة بستين نيلة عشان يظبطوا حالهم و الناس تنقلب على الثورة و الحياة ترجعلهم تاني.او لأن مصر دي بلد كبيرة أوي فناس كتيرة أوي نفسها البلد دي تقع و الناس دي أترعبت لما شافت ميدان التحرير و لما شافتكم و إنتم بتهزوا عرش الفساد و الإستبداد فعشان كده اللعب اللي جاي هيبقى على تقيل أوي أوي يعني هنلاقي حوارات فتنة بالعبيط من نوعية قبطي و مسلمة مسلم و قبطية شيعي و سنة و مش بعيد كمان أهلاوي و زمالكاوي زي ما لعبوها مصري و جزائري فلازم نخلي بالنا أوي أوي أوي.وعشان مصر دي بلد كبيرة أوي و شعبها كبير أوي فأكيد زي ما كان فيها المفسدين أكيد فيها المصلحين و و الله ما أكثرهم بس يا ريت نفهم إن ده وقت الشغل و الإجتهاد و هذكر كلمتين هنا لواحد أدين له بفضل كبير عليا في العمل و في الشخصية كان بيقولي أنا معرفش أكون موظف أنا لازم أبتكر و أعمل و أجتهد في اللي إيدي على الرغم من إنه كان ممكن يقعد من غير ما يعمل غير اللي مطلوب منه و هياخد مرتب و مش بعيد كان ياخد مكافأة كمان و كلمتين كمان لسه سامعهم طازة من زميل عزيز عليا أوي بيقول فيهم كنت عمالة مؤقتة و كنت كل ما ألاقي الضغوط أكبر عليا كنت أشتغل أكتر و أكتر و كل ما ألاقي المؤمرات بتحاك ضدي كنت بجتهد و بعد ده كله مكنتش عاجب لحد ما قلت يا رب لقيت اللي بيضطهدوني هما اللي بيحطوني فوق راسهم و بعد ما كنت عمالة مؤقتة لقيت الشركات بتتخانق عليا عشان أتعين يعني إجتهد و قوول يا رب هتلاقيه كريم أوي أوي بينا.وعشان مصر دي بلد كبيرة أوي كان اللي راحوا ميدان التحرير كتير أوي بس مش دول بس مصر لقى فيهم كتير من أمثالي صحيح أنا رحت كام مرة كده بس وقت الشدة مكنتش موجود وقت القناصة و وقت الضرب و القنابل المسيلة للدموع و معارك الحمير و البهايم مكنتش موجود بس قلبي و قلوب ناس تانية كتير أوي معاكم فسيبكم من أعداء الثورة اللي عمالين يقولوا أنتوا مليون و إحنا 75 مليون عشان أنتوا اللي 80 مليون و هما و لا حاجة دول ربنا أعلم بيهم و أعلم باللي وراهم.وعشان مصر دي كبيرة أوي و مات منها كتير أوي عشان تتحرر من الأستبداد و الظلم قبل ما ترمي ورقة في الشرعة تخيل أحمد بسيوني واقف قدامك و قبل ما تشمت شيكابالا تخيل كريم بنونة قاعد جنبك في المدرجات و قبل ما تعاكس تخيل إنك هتعاكس سالي زهران و قبل ما تصهين في شغلك و تقضيها الناس لبعضيها أفتكر عبد المنعم رياض و إبراهيم الرفاعي و اللي زيهم من أخواتنا اللي قدموا حياتهم تمن عشان تمشي في مكان نضيف و تاكل أكل نضيف و تشرب مية نضيفة.وعشان مصر كبيرة هننسى حسام و أخوه و الغندور و اللي خلفوه و تامر أمين و زينة و تامر حسني و يسرا و طلعت زكريا و سماح أنور و هناء و سيد و قناة المحور كلها في كتير محترمين هنتفرج على عمرو واكد وخالد الصاوي هنتابع أفلام بشرى و بسمة هنتابع برامج بثينة كامل هنقرأ لعمرو حمزاوي و وائل قنديل و الأسواني هنمشي ورا دماغنا مش ورا دماغ أي حد وعشان مصر كبيرة أوعدكم إني مع كل أستفتاء أو إنتخاب هسيب الكنبة الوثيرة الأثيرة و هشيل اللاب توب و هقوم أنتخب و قبل ماأنتخب هشوف برامج كل واحد بيقدم إيه و بيقول إيه هيعمل إيه و إزاي و ليه مش هنتخب عشان مسلم و لا عشان مسيحي عشان أهلاوي و لا زملكاوي عشان ست و لا راجل هنتخب اللي هيقول اللي فيه مصلحتي أنا و أهلي و مصلحة مصر.وأخيراً و عشان مصر دي كبيرة دقت ساعة المنبه إلى الحمام إلى الحمام النسكافيه النسكافيه إلى الشغل إلى الشغل.  

أهم أخبار مصر

Comments

عاجل