شعبولا: سأقرأ القرآن لو حكم الإخوان وأقول آمين لعمرو خالد

غزة - دنيا الوطن قال الفنان الشعبي المصري شعبان عبد الرحيم إنه سيتحول إلى قراءة القرآن الكريم حال وصول جماعة الإخوان المسلمين إلى الحكم في مصر، وفي الوقت الذي أكد فيه أنه سيغني لرئيس مصر المقبل، فإنه ألمح إلى أنه كان مخدوعا في الرئيس السابق حسني مبارك، مرجعا سبب غنائه له بأنه لم يكن يعرف حجم ثروته هو وباقي رجاله في النظام. وقال شعبولا "لو الإخوان المسلمين مسكوا الواحد هيقرا قرآن وخلاص هخش برضوا تبع الخط، يعني همشي ورا عمرو خالد هو يتكلم وأنا أقول "آمين". وأضاف -في حوار لصحيفة صوت الأمة القاهرية هذا الأسبوع- "أنا هبقى تبع الجو بقى وهغني للرئيس الجديد، وهعمل إيه ما أنا لازم أقوم بقى واشتغل، ويارب الناس الجديدة دي تطلع كده وتظبطنا بقى". وبرر "شعبولا" غناءه المؤيد للرئيس مبارك بقوله "مكنتش أعرف إن الناس دي واخدة فلوس كتير كده، ولا إن الناس دي بتسرق حاجة خالص يعني مين كان يقول إن حبيب العادلي (وزير الداخلية السابق) ده هيأخد كل الفلوس دي، ويمشي بيها ولايحطها في البنك، ويسبنا إحنا تعبانين، والريس كمان يعمل كده". وتابع شعبولا "هغني وأقول خدوا الفلوس، ومشيوا وراحت علينا بس أنا مش عارف هي الفلوس اللي خدوها دي هيجيبوها للناس اللي كانوا قاعدين في ميدان التحرير؟". وأضاف شعبولا "الريس كان كفاية عليه كده، بس برضوا أنا زعلان عليه عشان إحنا طلعنا لقيناه قدامنا، فالمفروض كان يمشي بطريقة غير دي عشان كان هيبقي شكله أحسن، أصل كده شكله بقي مش كويس وحرام كده ده دلوقتي في غيبوبة وبعد ده كله يتعمل فيه كده". وقال "الراجل ده اتعود إن الناس تجيبله الأكل، وناس تشيل الأكل بعد ما ياكل، وكل حاجة وهو قاعد دلوقتي مفيش الكلام ده لا ليه ولا لعياله ولا لمراته ومباقش حد حواليه، حرام كده والله". وعن رأيه في ثورة 25 يناير وشباب ميدان التحرير قال شعبولا "والله حاجة كويسة، وأهو تجديد برضه وهي دي التكنولوجيا ودي شباب كويسة، وعملوا اللي عليهم وجددوا مصر، بس المفروض إنهم كانوا بعدما مشوا الرئيس إنهم يمشوا على طول". وبرأ شعبولا الشرطة من دم الشهداء قائلا "الشرطة مضربتش حد، الناس والشرطة كله كان بيضرب في بعضه، يعني الناس بتضرب في الشرطة والشرطة بتضرب في الناس، وكل واحد فيهم كان بيدافع عن نفسه". وتابع "الشرطة دي ساعة مامشيوا وسابوا الأقسام دي أوامر واخدنها وميقدروش ميعملوهاش، بس مش في قسم واحد ده في كذا قسم، يعني لازم يكون في حد كبير هوه اللي قالهم يمشوا، دول بياخدوا أوامر أمشي أمشي، اقف اقف، اضرب اضرب مبيفكروش فيها، وبيني وبينك لما يمشوا أحسن مايقفوا قصادهم ويضربوا بالنار".