المحتوى الرئيسى

الثورة وشفيق في الميكروباص بقلم : أحمد بدوي

03/01 13:46

الثورة وشفيق في الميكروباص بقلم : أحمد بدوي في نقاش دار في الميكروباص أمس بين كل من في الميكروباص الكل يدلوا بدلوه في ظاهرة صحية فالثورة جعلت الكل يتكلم دون أن يخاف أن يكون بجانبه مرشد ممكن يسلمه تسليم أهالي ،اليوم أصبح الصوت عالياً ولكن ما أزعجني أن الكل يتكلم أن الثورة ليس لها أي نتائج ذات مردود إيجابي على الشعب فظلوا يعددوا سلبيات الثورة رغم أنهم فرحوا لها ،فهذا يتكلم عن الانفلات الأمني وإن مبقاش في حكومة وكل واحد في شارعهم بقي معاه " فرد " والخناقات بقت بضرب النار واللي يموت ملوش دية ،والأخر تحدث عن استغلال سواقين الميكروباص لهذا الانفلات بان يعلوا الأجرة أو يقول السواق في شموخ " الكراسي أربعات يا حضرات " وياويلك لو رديت هيقوم رادد في عظمة " العربية مش طلعة يا بهاوات " وممكن يعمل حالة فتنة بين الركاب عندما يقول " أنا مش طالع غير لما الأستاذ اللي اعترض ينزل" ،وآخر يتحدث عن كمية الفساد التي ظهرت وكمية المليارات التي نسمعها يوميا وعن " النائب العام " اللي بيظن أنه مبينمش اليومين دول من كتر التحقيقات ليقوم راكب تاني مقاطعه مش هو دا نفس النائب اللي كان أيام مبارك كان فين زمان ولا لما " العجل " بيقع بتكتر سكاكينه الرجل دا لازم يمشي هو كمان، فياتي صوت من الكنبة بس أنا شايف يا جماعة أن شفيق مش وحش نسيبه يشتغل الكام شهر دول أنا متوسم فيه خير حتى يا أخي مش متكبر وبيلبس بروفلات زينا وخلي مطار القاهرة ومصر للطيران زي الفل ،أنا قاعد بسمع ومش عايز أشارك أتحين الوقت المناسب للمشاركة ،فيتحدث راكب آخر ويقول أحلى حاجة عملوها أن الانتخابات بالرقم القومي ،فتحمست وأخذت نفس عميق وتكلمت أيوة كله لازم يشارك لو حد مشاركش ومرحش ينتخب يبقي هو الغلطان ولا يلوم إلا نفسه وبعدين يا جماعة الثورة مش بس ثورة على النظام الحاكم وإسقاطه الثورة هي أن كل شخص مننا يثور علي الشخص السيئ بداخله ليجعله يرحل دون عودة ،يعني كل واحد يراقب نفسه يعمل الصح يصلح من نفسه ومن الأشخاص اللي ليه تأثير عليهم عايزين نبدأ عهد جديد نشتغل وننتج وفي نفس الوقت نصلح ونبني ونشارك وننتخب ونسأل ونحاسب لازم نبقي إيجابين الكبير يعطف والصغير يحنو مش بنطلب حاجة غريبة علينا عايزين نرجع في تعاملاتنا مع بعضنا لوراء شوية نرجع لعادتنا وتقاليدنا نقول للغلط لا ونقف كلنا جنب الصح ،يقاطعني راكب يعني أنت يا أستاذ مع أن شفيق يكمل ولا ويمشي ،قولتله أنا عايز رد واحد بس ليه أبو الغيط ومرعي ومشعل ويونس لسه موجودين في وزارتهم مش دول معينهم مبارك اللي فساده وصل للرقاب؟؟؟. ليه عزمي والشريف وسرور متقدموش للمحاكمة مش دول اللي كانوا بيحكموا مصر مع جمال بمبدأ إدارة الوسية؟؟؟. ليه لسه في ناس بتعتقل وليه لسه في ناس معتقلة سياسيا مش المفروض أن أحنا عملنا الثورة عشان يبقي مفيش حد بيعتقل عشان معارض للحكومة؟؟؟. ليه متحلش جهاز أمن الدولة وجهاز الشرطة بالكامل ويعاد هيكلته مش دول اللي 98 % داخلين يا بواسطة يا برشاوي؟؟؟،يبقي لازم الجهاز يتحل ويتم الإعلان عن طلب مؤهلات عليا بمواصفات معينة يحصلوا علي دورات تدريبية مكثفة ويكون وزيرهم شخصية عسكرية مفيش مانع بس ترجع الشرطة بأسلوب عمل مختلف بزي مختلف بأشكال مختلفة فتلاقي قبول من كافة الشعب صح ولا ايه ؟؟؟ ليه أي مسئول بيتمسك بمكانه لاخر لحظة واخر نفس حتي مع كره الشعب له يعني الناس تقول شفيق يمشي يبقي من احترامه لنفسه انه يرضخ لارادة الشعب ؟؟؟. هنا يباغتني السواق :الآخر يا حضرات .

أهم أخبار مصر

Comments

عاجل