شوال الهم /17 الكفالة بقلم:صالح صلاح شبانة

شوال الهم مجموعة من المشاهد المسرحية الملتقطة من المجتمع المحلي جمعها وصورها ووضعها بين دفتي كتاب الداعي بالخير صالح صلاح شبانة المشهد السابع عشر : الكفاله الممثل 1 : أنا زعلان منك ، وهالصله اللي بيني وبينك بدي أقطعها ، وبالناقص عنك وعنها يا ناقص ..!!! الممثل 2 :(بدهشه) كفى الله شرك ، ليش بدك تقطع هالصله اللي بيني وبينك ؟؟ الممثله : أكيد في سبب مهم ، وما في دخان بلا نار ، ولأنك أبو الأسباب المهمه ، (للأول) : ليش أنت زعلان منه ؟؟ الممثل1 : لأني طلبت منك تكفلني أوخذ قرض من البنك أمَشي أموري المعركسه وانت مطنشني ..!! الممثل 2 : (جادا) شوف يا اخوي ، الله الله عَ الجد ، والجد الله الله عليه ، والمثل شو بقول ؟؟ الممثله والممثل 1 : (معا) آه شو بقول ؟؟ الممثل 2 : بقول : (إذا صاحبك بدك تبقيه ، لا توخذ منه ولا تعطيه) ...!!!! الممثله : بس هو مش طالب منك تعطيه ، هو طالب منك تكفله ..!! الممثل 2 : لو طالب مني ومعي أعطيه كان أحسن بكثير ..!! الممثله : (ساخرة) هو إعربلنا اياها ؟؟ الممثل 2 : لو طلب مني اشي موجود معي ، وأعطيته اياه ورده خير وبركه ،واذا قرطه ودقه علي وهو الأرجح ، لمعرفتي بأخلاقه الطيبه ، رح أقول إشي ما فيه نصيب ، وأعض على الجرح ..!! الممثله : وشو أفرقت ما دام عندك هالروح المثاليه العاليه ؟؟ الممثل 2 : بتفرق كثير ، (بلهجه خطابيه) في الحاله الأولى يا ساده يا كرام بكون صاحب المبلغ ، ومالكه ، والمبلغ طار وما حدا رح يطالبني فيه ، وبكون كرمت ، أو فرطت بمالي الخاص ، بس في الحاله الثانية أنا كافله بمال البنك ، وأنا ما حيلتي غير راتبي هاللي بنقط بحلقي وحلوق هالقواريط ، واذا لعب معي بذيله بدي أشحد أنا واياهم ..!! الممثل 1 : تف من ثمك يا زلمه ..!! الممثل 2 : وانت يا صاحبي أنا عارفك وعارف أطباعك ، وياما انقرصوا ناس ، وانا بصراحة ربنا ما بدي أبقى مقروص مثلهم والعاقل اللي بتعلم من غيره..!! الممثل 1 : انت سيء النيه وبتظن في الناس السوء ، ليش حاسب اني مش رح أدفع ؟؟ الممثل 2 : كل اللي بدهم كفاله بعملوا مثلك ، بصير يتمعمل مثل البسه ، ويتمسكن لما يتمكن ...!! الممثله : وعلى رأي المثل (داينه بفرفش ، امهله بغرش ، طالبه بخرمش) ...!!! الممثل 2 : وأنا جسمي ناعم وما بتحمل الخرمشه ، فالله يوفقك اخلع من راسي وخليني في حالي ..!! الممثل 1 : يا أخي أصابعك في ايدك مش واحد..!!! الممثل 2 : بلاش تحرق دماغي ، أنا ما اللي ثقه لا بكفاله ولا بوكاله ، وكل واحد عقله براسه يعرف خلاصه ..!!! الممثله : طيب الكفاله خايف تتغرم ، والوكاله ناقز منها ليش ، مع انه أحلى ما انقال بالكفاله (أولها شهامه وثانيها ندامه ، وآخرها غرامه) يعني بدك اتطقهن بالقرش والتعريفه...!! الممثل 2 : لأنها الوكاله أدهى من الكفاله وأمَرّ ، وهو المحترم قايل لي عن نهفة من ورا الوكاله خليه يقولها قدامك وانت احكمي بنفسك ..!! الممثله : هات خلينا نتغم هااااااااااااااااااااااااااات ..!! الممثل 1 : في واحد أعطى ابنه وكاله عامه لأنه بقى مسافر مشان يطلق إيد ابنه (يبتسم) حلوه يطلق هذي ، مش عارف كيف طلعت معي ..!! الممثله : كمل حديثك وبلا فلسفه فاضيه ..!! الممثل 1 : المهم (للممثله) هو انت لازم تظلي كاتمه على نفسنا وما نطلع عن النص ؟؟ الممثله : الهي يقطمك من النُص ويشبحك عَ النَص يا رب ..!! الممثل 1 : صاحبي هذا استغل الوكاله العامه اللي معه من أبوه ، راح تناقر هو وامه ، منه كلمه منها كلمه راح مطلقها من أبوه بالوكاله اللي معه ...!!! الممثله : (بدهشة) طلق امه من أبوه ؟؟ يا مالي طلق يندف عينه وعين أبوه ؟؟؟!!! الممثل 2 : وبدك اياني أعطيه وكاله ولاّ كفاله ، وكأنه من تالي عيلتي وأهلي ..!!! الممثله : اذا الأبن طلق امه من أبوه ، هذا شو بده يعمل فيك يا مسخم ؟؟ الممثل 2 : يا جماعة الخير ، أيام زمان بقى الواحد إذا نطق يعتبر لسانه عَقد أكثر من الشيك والكمبياله ، وقديما قالوا الحمار بنربط من ارسانه والزلمه برتبط ما لسانه ...!!! الممثل 1 : والكلمه بقت أحد من السيف ..!! الممثله : (بحسره) وابياخ ، هالأيام بطل اشي يربط ، لا اللسان ولا الرسان ، والسيوف صارت حطب للمواقد...!!! الممثل 2 : أيام المجاعه الله لا يعيدها ، واحد بسأل جار الهم وبقول له : ما بلاقيش حواليك شوال شعير تقرضني اياه للموسم ولاَّ لساعة فرج ربنا يفرجها علينا وعليك..؟؟ الممثله : (بدهشه واستفهام) لحظه لحظه أنت قلت مجاعه .. وقلت شعير .. هو طلب قمح ولاّ شعير ؟ الممثل 2 : طلب شعير .. لأنه القمح مفقود فقدان تام ،وما بنال صاع قمح إلا اللي أبو زيد خاله..!! الممثل 1 : كمل .. يعني بدهم يعجنوا ويخبزوا بشعير ...؟؟!! الممثل 2 : ايوه يا جماعة .. وبلاش ندخل حصة تاريخ المجاعه الله لا يعيدها ،... احنا بدنا نحكي عن عقد اللسان اللي اهم من الشيك والكمبياله ..!! الممثله : يا زلمه احكي .. مغصت بطوننا وانت تمطمط ..!! الممثل 2 : معك حق ، الزلمه قال للي طلب منه شوال الشعير ، جيب حمارك وتعال خذ الشوال .. وروّح على مرته وقال لها : اطلعي شوال الشعير لأنه جارنا فلان بده يوخذه .. الممثله : ( تمثل شخصية المرأه ) : ( تلطم ) يا كشلي يا ضيم حالي .. شوال الشعير ؟ الممثل 1 : ايوه يا مره .. شوال الشعير ..!! الممثله : يا زلمه احنا لا فوقنا ولا تحتنا ولا ورانا ولا قدامنا غير شوال هالشعير .. بدك ايانا نموت من الجوع ؟ الممثل 1 : انا صرت ناطق في الشوال لجارنا .. ولو تموتوا واحد ورا الثاني من الجوع ما رجعت بكلمتي ، وانت عارفه هالحكي مليح ..!! الممثله : ( تلطم ) يا حسرتي يا ضيم حالي .. هاتوا هالقدره خليني اسخم وجهي ..!!! الممثل 1 : اطلعي شوال الشعير واعطيه لجارنا وبعدين هاتي القدره وخليني اسخم وجهي مع وجهك...!!! الممثل 2 : وأعطى شوال الشعير لجاره يوكل هو وأولاده وخلا عيلته بلا أكل لأنه نطق ..!!! الممثل 1 : يا سلام على الوفاء .. بس انا وزميلي المحترمه واحنا نمثل المشهد تطرقنا للقدره مشان تسخيم وجوهنا .. شو هي القدره ؟ الممثل 2 : طنجرة نحاس ، أو من الفخار ، بقوا يطبخوا فيها عَ الحطب فبتقوم تتسخم .. يعني تصير سوده من الدخنه .. وبقى دليل الحزن عندهم يدهنوا وجوههم سخام اسود ..!! الممثل 1 : تروح تكفلني اوخذ القرض ولاّ أسخم وجههي ؟ الممثله : انا رايحه اجيب القدره اسخمك واسخمه .. واسخم حالي بالمره .. يضحكون الداعي بالخير صالح صلاح شبانة http://turath.mo5ayam.com/vb/index.php منتديات سنجل الباسلة الموقع الشخصي للكاتب والباحث صالح صلاح شبانة هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .