المحتوى الرئيسى

شوال الهم / 15 حراميه خايبين بقلم:صالح صلاح شبانة

02/24 01:50

شوال الهم مجموعة من المشاهد المسرحية الملتقطة من المجتمع المحلي جمعها وصورها ووضعها بين دفتي كتاب الداعي بالخير صالح صلاح شبانة المشهد الخامس عشر : حراميه خايبين الممثل 1 : ( لزميله الممثل 2 + الممثله ) ، انا يا جماعة الخير افتخر واعتز اني حرامي خايب من عيله حراميه خايبين . الحراميه بتصيب معهم وبتخيب وعمرها معي ما صابت..!!!! الممثله : ( ضاحكه ) ومتباهي كتير يعني في هالنسب العريق..؟؟!! الممثل 2 : احسن اشي في الحراميه الخايبين انه دمهم ببقى خفيف ونهفاتهم حلوه ، ومن مبدأ شر البليه ما يضحك بتبقى تدخل البسمه على القلوب والشفايف منها وغاد...!!!! الممثله ( ساخره ) على رأي ملحم بركات .. هات خبرنا شو صار ليلتها ..!! الممثل 1 : هذاك اليوم واحد مثل افضالي خاطف شنته من وحده عجوز كركربه ، على رأيه ما فيش فيها ولا نتفة حيل .. هو خطف الشنه وشمّع الخيط ، وهي تتشمر وتلحقه أتاري عشرين جني ما بلحقوها ، عرقلته في العصاه ولا وهو طب على وجهه ، بركت على صدره وبلشت فيه خبط لماّ خلت البين يخبطه ، وما رحمه الاّ الله ثم الشرطه اللي قاموها عنه واخذوه على السجن ..!!! الممثله : وعلى رأي المثل ( ميت اخص ولا مات رحمة الله عليه ) ..!!! الممثل 1 : انا فكري ساوى مثل هذاك الواحد ...!!! معاً : شو ساوى هذاك الواحد..؟؟!! الممثل 2 : أخذها على مدرسة بنات وفات على المديره وقال لها اصرفيلي اياها ببنات زغار..!!! ( يضحون معاً ) الممثله : الله لا يوطرز له هلى هالسواه .. يا ريت لماّ نعجز ننصرف لشباب وصبايا..!!!! الممثل 1 : وحرامي مثل افضالي اخذ هالفرد والشوال وفات على بنك الدم ، وحط الفرد بين عنين الموظف وقال له : طلع كل المصاري اللي عندك ...!!! الممثل 2 : وشو عمل موظف بنك الدم ؟ الممثل 1 : قحمش من الضحك وقال له : ولك هذا بنك دم .. مش بنك مصاري ! الممثله : والله يا جماعة الخير ذكرتوني بالعمْ جحا رحمة الله عليه ..!! معاً : وشو عمل العمْ جحا رحمة الله عليه..؟؟!! الممثله : راح اشترى حمار ، وهو قايده وراه شافوه اثنين حراميه وقرروا يسرقوا الحمار منه .. راح فك الرسن وشبكه في رقبته وهذاك اخذ الحمار وانهزم فيه ....!!!! معاً : وبعدين ؟ شو صار ؟ الممثله : ولا قبلين ، لماّ انتبه جحا بعد ما وصل الدار لقي حاله قايد شخص ومش حمار ، سأله : انت مين ؟ قال له انا واحد الله يعيذك غضيب والدين ، امي زعلت مني ودعت علي وقالت : يا رب تصير حمار ، صرت حمار ، وربنا سبحانه وتعالى فك سحري على ايدك الطاهره .. هات اعطيني ايدك ابوّسها .. ونزل فيها تبويس ومصع من العمْ جحا ولحق صاحبه مشان يوخذ حقه من لحمار ...!!! الممثل 1 : يخرب مطنه شو أزعر .. هذا مش خايب مثلي ومثل عيلتنا .. والله يا عمي لو بطلع بيدي هيك كان ابو زيد خالي ..!!! الممثله : ومش هون النكته .. النكته ثاني يوم نزل جحا يشتري حمار جديد ، فشاف لحمار اللي سرقوه منه واقف بين الحمير ، راح وشوشه في ذانه وقال له : آه يا غضيب الوالدين .. رجعت زعلت امك وانمسخت حمار .. بس مش رح اشتريك..!!! الممثل : ودشره في السوق لنصيبه ، ابصر مين يصير صاحبه ..!!! الممثل 2 : على زمن الشقاوة راحوا اولاد عمي الثنين يسرقوا كرم عنب لواحد .. وواحد من عمامي نظره بيضتين على جمل .. يعني يالله يقشع عرام ضو ...!! نطوا عن السنسله اتاري صاحب الكرم نايم تحت السنسله ..!! معاً : وبعدين ؟ الممثل 2 : عمي اللي نظره خفيف نط في بطن صاحب الكرم ، ففز مثل المجنون وسحب الباروده من تحت راسه وحطها في بطن عمي ..!! معاً : ( بدهشه ) وبعدين ؟ الممثل 2 : المشكله انه عمي زعل وقال له : عمى اللي يعميك .. مش لاقي تنام غير تحت السنسله..؟؟؟!!! ( يضحكون ) ..!! الممثله : اما عم عمك هذا ، فوق انه حرامي صار صاحب حق..؟؟!! الممثل 1 : وانا اثنين من عمامي بقوا زعران البلد بامتياز ، ما بخلوا اشي غير لاقوه وبقى واحد من البلد عنده مشمشه ، بقت أول شجره مشمش تستوي في البلد . وبقى صاحبها يقعد تحتيها ويسند ظهره لجذعها ..!!! الممثله : هذا ناطور محترف ، بحافظ على الرزق والمال..!! الممثل 1 : ولا محترف ولا على باله ، بقى خايب ، واحد يجيه عن يمينه واحد عن شماله .. بس بينهم مسافه طويله .. البعيد بصير ينادي على بصوت كأنه بعيد وهو متخبي ( يا حسن .. يا حسن ) كون يشنف ذنيه لمصدر الصوت ويقوم متجه لمصدر الصوت ..!!! الممثل 2 : وعمك الثاني شو يعمل..؟؟!! الممثل 1 : مجرد ما تحرك من تحت المشمشه بيجي هذاك مثل الجن وإلا وهو في ظهرها ، يملي عبه وجيابه وينزل ، ويصير ينادي على حسن مشان ما يوصل ابن عمه..!!! الممثله : وبالتالي ؟ شو النتيجه ؟ الممثل 2 : بوكلوا المشمشه وبسرقوها رغم عنه ، ويروح يبلط البحر ..!!! الممثله : ما دام انتوا طلعتوا حراميه اولاد حراميه ، ليش اظل مخبي سلالتي الكريمه ؟ معاً : برضوا اهلك حراميه ؟ بان لِمغطى وانكشف .. بان...!!! الممثله : انا اللي عميين ، بس اذكياء .. راحوا يوم يسرقوا رمانات ..!! الممثل 1 : الغريب انهم حرامية زمان حرامية اكل ..!! الممثله : الله لا يذيقك مجاعات ايام زمان .. اللي خلت السرقه بطوله ..!! الممثل 2 : الله لا يعيدها .. وشو عملوا عمامك..؟؟!! الممثله : عمامي بقوا مشهورين انهم حراميه ، واحد حمل الثاني على اكتافه ، والمحمول هو اللي سرق الرمان ، وتقاسموا الغنيمه ...!! الممثل 1 : وليش عملوا هيك ؟ اما شغله غريبه ..!!!! الممثله : ما غريب الاّ الشيطان ، الناس زمان بقوا يخافوا من حلف ايمان الكذب واللي بحط ايده عَ المصحف لازم يبقى صادق ، وما بحلف كذب مثل هالأيام .. لأنه بقى يخاف الله .. فالأول حط ايده عَ المصحف وحلف انه ما سرق من ارضه ولا لقط حبة رمان واحده ، والثاني حلف انه ما نزل بأرضه ولا داس ترابها برجله ..!!! الممثل 2 : والاثنين صادقين ، اللي سرق راكب ما داس الارض واللي داسها مركوب ما قطف ولا حبة رمان ..!! الممثل 1 : وصارت السرقه حلال زلال .. يا سبحان الله ! الممثله : هيك بقت عقلية الناس في هذاك الزمان..!! الممثل 2 : طبعاُ وخراريف الحرمنه والسرقه والذي منه كثيره ما بتخلص ..!! الممثل 1 : وقد ما فيها طرافه فيها حكمه وروح خفيفه وما بقى فيها اذى ..!! الممثله : السرقه اليوم اتطورت واللي بقى يزوّّّر ويتشردق بالشلن والبريزه صار يهضم الالف والمليون والمليار من غير ما يرف له جفن ..!! الممثل 2 : واللي بقى يسرق تيسد جوع البطن صار يسرق تيعمل ارصده ..!! الممثله : واللي بقى يسرق مشان يعيش وما يأذي المسروق برزقته ، صار يطحن عظم الفقيرلأنهم بقولوا الفقرا عظامهم ذهب وهو بده الذهب..!!!! معاً : دنيا .. يا دنيا .. قديش تغيرت وتبدلت ..!!!!! الممثل 1 : والفن الامريكي جاب لنا قواعد السلب والنهب والقتل والموت ..!!! الممثل 2 : وصارت الرصاصه تنطلق تقتل الضحيه قيل ما يناشده اللسان ..!!! الممثله : ومرات يبقى المغدور اللي انقتل مشان المال طفران مثلنا ..!!! معاً : وساق الله على ايام الحرامي الشريف ..!!! الممثل 1 : وعلى ايامنا اللي الشرف فيها تنجس ..!! معاً : دنيا .. وشو تقول للدنيا ؟ الداعي بالخير صالح صلاح شبانة http://turath.mo5ayam.com/vb/index.php منتديات سنجل الباسلة الموقع الشخصي للكاتب والباحث صالح صلاح شبانة هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .

أهم أخبار مصر

Comments

عاجل