المحتوى الرئيسى

شوال الهم / 14 يجيها محَمّل بقلم : صالح صلاح شبانة

02/18 13:22

شوال الهم مجموعة من المشاهد المسرحية الملتقطة من المجتمع المحلي جمعها وصورها ووضعها بين دفتي كتاب الداعي بالخير صالح صلاح شبانة المشهد الرابع عشر : يجيها محَمّل ( يجلس الممثلون الثلاثه ويضحكون ويبدو عليهم السرور والجذل ) الممثل 1 : يا جماعة الخير والله فعايل النسوان بتخلي الواحد منا يهستر وهو يضحك . الممثل 2 : يا اخي الست ممكن تتسامح بأي اشي إلاّ في مسألة الضره وانه جوزها يروح منعمي بصره ورايح متجوز عليها ..!!! الممثله : هسه تعال للوحده منا وقول لها انه جوزك بده يبني دار ..!! الممثل 1 : كون تقولك : ومنين القشل وغراب البين لماّ يبني دار..؟؟!! الممثله : ولاّ قول لها انه جوزك بده يشتري سياره ..!! الممثل 2 : كون تقولك هو لاقي الخبز يتبلعس ويتقلعط هو واولاده لماّ يشتري سياره..؟؟!! الممثله : بس لو قلت للوحده منا انه جوزك بده يتجوز عليك كون تصدق ..!!! الممثل 1 : علماً يا ناس انه ما بعمل هالعمله غير المجنون او المغامر ..!! الممثل 2 : والمجنون موجود والمغامر موجود بس عاد النسبه تبعهم قليله ..!! الممثله : المره مثل الفريك ما يتحب يبقى لها في البيت شريك ..!!! الممثل 1 : هذاك اليوم سمعت هالطرفه بتفطّس من الضحك ..!! الممثل 2 : واحد صاحبك الله يرحمه بقى الله منعم ومتفضل عليه ، ورحمة الله عليه ومات ...!! الممثله : وبقى عنده مره اقل مني جمال وفتنه بنقزه وبيت ما شاء الله قصر ..!! الممثل 1 : وخافوا عليّ شعورها يروحوا مبلغينها اللي صار وتروح فيها ..!! الممثل 2 : فاتوا عليها بعد ما حطوا جنازة جوزها بره وقالوا لها : إحنا آسفين عنا خبر مزعج..!! الممثله : قالت لهم : خير يا طير .. اللهم اجعله خير..!! الممثل 1 : قالوا لها : ترى جوزك دخل بالبورصه وخسر جميع امواله وما ضل معه ولا قرش..!! الممثله : تنهدت وقالت : اللي جابهن بجيب غيرهن وطول عمره زلمتي جياب ، مثل الذيب ، بغيب وبجيب..!! الممثل 2 : قالوا لها شو رأيك انه القصر اللي انتِ فيه طلع مرهون للبنك وانه البنك بده يطردكم منه ويستولي عليه ؟ الممثله : قالت لهم : اللي بناه ببني عليه وطول عمر الزلمه بجيب وببني ..!!! الممثل 1 : قالوا لها : ايش رأيك انه جوزك تجوز عليك ..!! الممثله : هي سمعت هالسمعه ومعطت شعرها وخمشت وجهها وصرخت يا حسرتي يا ضيم حالي .. هو ساوى هالسواه عن صح..؟؟!! الممثلان : سواها يا غبره يا حزينه عن صح وصارت واستوت ...!! الممثله : قامت رفعت ايدها للسما وقالت : يا رب يجيني محمّل ..!!! الممثل 1 : قام واحد منهم صاح على اللي بره وقال لهم : دخلولها اياه ..!! الممثل 2 : وبهذه الطريقه الفذه بلغوها الخبر ولا انصدمت ولا صار فيها بلا ..!! ويا هيك التبليغ .. يا بلاش !! http://www4.0zz0.com/2010/03/27/12/668939012.jpg الداعي بالخير صالح صلاح شبانة http://turath.mo5ayam.com/vb/index.php منتديات سنجل الباسلة الموقع الشخصي للكاتب والباحث صالح صلاح شبانة هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .

أهم أخبار مصر

Comments

عاجل