المحتوى الرئيسى

شوال الهم / 11 انتخابات نيابية بقلم : صالح صلاح شبانة

02/09 16:39

شوال الهم مجموعة من المشاهد المسرحية الملتقطة من المجتمع المحلي جمعها وصورها ووضعها بين دفتي كتاب الداعي بالخير صالح صلاح شبانة المشهد الحادي عشر : الأنتخابات النيابية الممثل والممثله يجلسان يتجاذبان الحديث ...!! الممثل 2 : ( يدخل مندفعاً بحماس ) ابشروا يا جماعه ابشروا ، ربنا فتحها علينا من اوسع الابواب وصدرت الاراده الملكيه بحل مجلس الامه ، وفرط البرلمان ..!!! الممثل 1 : وعلى ايش انت مبسوط ؟ ولاّ مثل الجاج بتفرح للكرابله ...؟؟؟!!! الممثل 2 : حل مجلس الامه معناه ناس بدهم يترشحوا لماّ يصيروا نواب ..!! الممثله : وبترشح لهم الفين قولوا ثلاث تلاف واحد لماّ يطلعوا ميه وعشرين حسب آخر طبعه ..!! الممثل 2 : وبدهم يطولوا اللي تحت البلاطه وبدهم يصرفوا بسخاء ، وكان حاتم ذبح الحصان ، بدهم يذبحوا الجحش..!! الممثل 1 : وعلى هالأساس بدها تنتشر بيوت الشعر والصيوانات في كل زقه وزاويه ..!!! الممثله : وبدها المناسف وسدور الكنافه والقهوه والشاي والتسالي والفواكه تشتغل على قدم وساق لأبو موزه ..!!! الممثل 1 : ومن شهرين لأربعه ، وبجوز لسنه اذا ببلشوا يسخنوا من اليوم بدك تلاقي محل تقعد وتسهر وتهرج والكل يسمعك ويطولك الخير ، عشا وحلو وجايز مصروف جبب ببلاش ، وبدك تصير أهم واحد في البلد ، لو انك يا لبعيد ، كش بره وبعيد ما بتسوا ملا ذانك بزاقه ..!!!! الممثله : يعني بدك تتنغنغ حالك في هالجمعه المشميشه ....!!!! الممثل 2 : وكل المرشحين اللي بفوزوا واللي بسقطوا اصحاب مصالح ، وبعرفوا من وين بتاكل الكتف ، وانت مجرد صوت ، بتزعقه في الصندوق يوم الأنتخابات بعد ما تقبض اللي فيه النصيب..!! الممثل 1 : ومجرد ما خلص العرس لا اللي بنجح وصار نائب سأل عنك ولا اللي سقط وغز كوع داري عنك على رأي أهل اربد لا انت في (الـ....) ، ولاَّ في القريه...!!! الممثله : ومن هون لأربع سنين يخلق الله ما لا تعلمون .. ويا دار ما فاتك شر ..!!! الممثل 1 : انا مثلاً بحب الكذب والعرط وتأليف قصايد المدح والكذب .. واعجبكم لما ّ اوقف ورا المايكرفون ، وابلش أخرط ، بعمل الفار جمل والكلب أسد والبس نمر ..!!!! الممثله : وبنعرفك لا بتستحي ولا بتخجل لما بتكذب ، لا من الكذبه الزغيره ولا من الكذبه الكبيره ...!!! الممثل 2 : يعني بدك اياه في موسم حصيده الكذب يصير صادق وابن اصل وفصل ، أصلا ما حدا بصدقه..؟؟!!! الممثل 1 : قول لحالك يا تبع الطبيخ ، ياللي بتشم ريحة الطبيخ قبل الحج بمرحله ..!!! الممثله : وانا بظل اتزرّوق بين دواوين هالنسوان .. وبطولني خير كثير من فتح فنجان القهوه ، لقراية خطوط الايد لتفسير الاحلام وموسم يا دنيا ، وملعون أبوه اللي بموت من خاطره..!! الممثل 2 : وبطلعي مصاري الهبل .. ما هو رزق الهبل على المجانين ..!!! الممثل 1 : ناس يا اخي بتحب تسمع الاخبار الطيبه ، بتحب السراب ، ليش ما تعطيهم ، ما هو موسم الكذابين والمنتفعين ..؟؟!! الممثله : كل المرشحين وطنيين ، بفتح الواحد عيونه وبحط الوطن فيهن وبغمض عليه ، لبين ما ينفض المولد..!! الممثل 1 : بجرح جلده وبحط الوطن تحته وبخيط عليه ، لما يبين هو قمحه ولاّ شعيره ، مع انه الشعير قد القمح وقدود..!! الممثل 2 : لا بدهم اعفاء جمركي ولا سيارة BMW ، ولا بدهم مصالح خاصه .. ولا بدهم اشي غير خدمة الوطن..!! الممثل 1 : وكل هالأمتيازات بوخذوها عن طريقنا لماّ نعطيهم الصوت ، محروق ابوك يا صوتي قديش غالي من غير ما أبقى عارف قيمتك ، صحيح اللي ما بعرف الصقر بشويه..!! الممثل 2 : ونسبة الانتخاب 18 % ، 19 % ، 20 % ان طارت ، يعني ساقطه أصلا ..!! الممثله : وحبيباتي نسوان الكوتا جايز بميه وخمسين صوت تصير نائب ، وغصب عنهم تقرر مصير 6 ملايين مواطن ..!! الممثل 1 : واكثر حبايبي النواب الف ، الف وخمسميه صوت بصير سعادة النائب ، وبجعص علينا ، وبنصير نتلمس ذياله..!! الممثله : ولا اصواته ولا اصواتها ولا اصواتهم مع بعض ، قلم قايم بوصلن سعادته عضو مجلس بلدي في بلد مثل عمان ولاّ الزرقا ولاّ اربد...!!! الممثل 2 : ولا عضو في نادي من النوادي اللي بتشتغل مليح ، والأنتخابات فيها كسر عظم ..!!! الممثل 1 : ولا في جمعية خيريه لبلد اهلها مش مؤمنين بجدوى الجمعية ..!!! الممثله : وبجعطوا علينا .. سعاده وطمعان بمعالي ولاّ دوله .. وسياره بنمره كشخه وحصانه .. واضرب واطرح ..!!!! معاً : ويا هملالي .. يا حلالي يا مالي .. يا ربعي ردوا عليّ ..!!! الممثل 2 : الموسم جاي وانا بنتظر هالموسم بفارغ الصبر ، وتجوع يا سمك مشان توكل مناسف وتتحلى على كنافه وتأرجل معسل ملغّم للحشاشين .. والسمك انا وأنتوا..!!!! الممثل 1 : وانا بدي اطول مخزون الشِعر والنثر واجلخ لساني واخليه مثل الكرباج ولو بنقعه بسطل مية نعل عند اسكافي تراثي.. يسمط منافس كل واحد بدفعلي ..!!! معاً : مرحى للتنفيع .. حك جحاش حك لي تحكلك ..!!! الممثل 1 : من حق المرشح يحط مخلاة شعير للصوت وللي بده ينتخبه ، ولو انه العليق عند الغاره ما بنفع..!!! الممثل 2 : علمتنا التجارب انهم المرشحين الفايزين والخاسرين اصحاب مصلحه ، بتخلص مع تسكير الصناديق..!! الممثله : ومن حق كل بني آدم انه يراعي مصالحه وبعد نفسك عد صاحبك ..!! الممثل 1 : واكثرهم الغياب عن جلسات المجلس ، عنده عاده ، وهو مش سائل عن الراتب لأنه لو حك جلده بطلع اضعاف اضعافه ، ولو أطلع صوت منكر من اللي بالي بالك ، بهر الذهب من قفاه..!! الممثل 2 : وهو بده لقب ونمرة سياره يجعص فيها عليها مجلس النواب ، وصداقه من الحكومه ، ووجاهه ولقب سعاده والسعي بقوه للمعالي والدوله منها وغاد ..!!! الممثل 1 : واحنا قدمنا له الصوت ، اللي هو الراكوبه لتحت القبه ..!! الممثله : وليش هو يسعد ويتهنى واحنا بعد ما يخلص الموسم نرجع للفقر والطفر وقلة والزفر ..!!؟؟ الممثل 2 : انا بقترح من هالمنبر الخطابي الكبير انهم يعملولنا انتخابات سنويه عن طريق حل ربع مجلس النواب سنوياً وانتخاب الربع بدال اللي انحل ...!!! الممثل 1 : وهيك بصير عنا عرس ديموقراطي سنوي بنعيش على قفاه ..!!! الممثله : وبتزدهر صناعة الحلويات وصناعة المناسف ، وبنعيش في بحبوحه ...!! الممثل 2 : وما بنهتم لأي قرار وزاري يرفع اسعار او ينزل اسعار لأننا في حزمة الامان..!!! الممثل 1 : والاموال اللي مجمده في الفريزر بنطولها وبنساوي حركه في السوق ، وبظل المواطن اللي ما بسوا قشرة بصله النجم السنوي المتوهج ..!! الممثله : ويا هملالي يا حركه .. ناس بتشتري اصواتنا وضمائرنا بمنسف وصحن كنافه.. وبشحن رصيد تيلفون ..!! الممثل 2 : وبعضنا ارحض ، ممكن تشتريه ببباكيت دخان ولاّ سيجاره ..!! الممثل 1 : وبعضنا بحب يجعص ، يسهر ويتسلى ويسامح المرشح من النفقات ...!!! معاً : وهذي دنيا .. بنهتف لها يا هلا بمواسم الأنتخابات ..!!!! الداعي بالخير صالح صلاح شبانة http://turath.mo5ayam.com/vb/index.php منتديات سنجل الباسلة الموقع الشخصي للكاتب والباحث صالح صلاح شبانة هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .

أهم أخبار مصر

Comments

عاجل