مش هاخونك..!

 (1) مش هاخونك.. ياللى شايل حلم بلدى فى عيونك ياللى حارس بكره من غدر الديابه ياللى نايم فى ميدان الحق بين ناسنا الغلابة مش هابيعك.. بالكلام المحشى بالوهم المشطشط والحديث الوردى عن بكرة المقطقط لما يفضل «بابا جدو» لحد سبتمبر ويرحل ونكّرمه ونعظّمه ونسلّمه.. فوق ملياراته اللى أخدها من جيوبنا وعمولاته اللى جمعها من حليبنا 21 طلقة فى الهوا وخروج مشرف.. زى ما يكون انسحب كما البطل. (2) مش هاخونك ياللى ركّعت اللى عمره ما ركع ياللى غيّرت الحياة الضيقة بقت وَسَع ياللى جبت لبكره ميت ألف حلم وكلّها.. أحلام على مرمى البَصَر محتاجه بس لصبر لأجل ما تبقى عَلَم وعليها ختم مغموس فى دم ماهوش زِفر دم ريحته مفحفحة ومعطرة.. كل الوطن. (3) مش هاخونك ياللى نايم ع الرصيف علشان تأمّنلى الرغيف ومنامش يوم تانى «خفيف» علشان مش لاقى العشا. مش هاخونك ياللى مدّفى بحلمى ويا حلمك ياللى متغطّى ببكره قبل ما ييجى ويخضع مقدرش أقولك إنى فارس معتمد هايصدّ عنك مقدرش أقولك إنى هاحرُسْلَك حُصُونك وتطمئن لحسن ظنك لكن مؤكد هاجتهد هارفع فى وش البلطجة.. هذا القلم واهتف معاك: «آن الأوان تنصرف ياللى بقيت مختلف ومعادش شىء يربطك بالناس دى غير الألم بينا وبينك دم وحزن ما يتْلَم وشهدا راحوا برصاصك ومروّحوش بالسم انت اللى لازم ترحل الأمس قبل اليوم» (4) مش هاخونك ياللى شايل يافطتك فوق الميدان الحر نصرك أمانة ووعد ما نخذلك فى الجد ونصون معاك العهد ولا نحنى ضهرك تانى علشان تعيش واقف راسك لفوق خالص زنهار كما الحارس تحرُسْلنا بكره زى ما نزعته من جوه بطن الجبل اللى بناه القهر. (5) مش هاخونك وَعْد واحد هادّيهولك هو إنّى مشْ هاخونك. [email protected]